Het iemand al 'n tree terug geneem en na die groter prentjie gekyk wat ons besig is om die laaste paar jaar in ons land uit te skets?
Ons is besig om 'n kultuur van onvergenoegdheid te vestig wat oor die lang termyn nie volhoubaar is nie.
Dis 'n baie, baie eenvoudige konsep, en kom neer op die volgende: 'n Mens kan nie minder insit, en meer uitkry nie.
Die stakingskultuur wat met tyd gevestig geraak het in ons land is 'n baie goeie voorbeeld hiervan. Dis maklik om te sien hoe dit besig is om buite beheer te raak as jy net oor die lang termyn na die neigings kyk:
Om te staak is 'n basiese reg in enige ontwikkelde en voortvarende land, en is 'n teken van 'n gesofistikeerde, dinamiese, dienstegedrewe ekonomie. Dis 'n algemeen aanvaarde feit dat nywerheidsaksie deur arbeieders toegelaat word in enige land met 'n relatief moderne grondwet.
Die manier waarop dié reg egter by ons misbruik word, spreek boekdele van die toekoms wat ons te wagte kan wees. Oor die laaste paar jaar het stakings, 'n meer gereelde, en amper sikliese tendens geword (tot so 'n mate dat daar deesdae van 'n staking-seisoen gepraat word). Werkers se eise en optrede het toenemend meer onrealisties en gewelddadig geword. Stakings oor die laaste paar jaar was elke keer 'n bietjie meer gewelddadig. Optogte het gelei tot vandalisme, vandalisme tot geweld, en hierdie jaar, in verskeie noodlottige botsings tussen stakers en owerhede (Marikana is nié die enigste voorbeeld van die jaar nie).
Eise het dieselfde pad geloop. Eise het begin by inflasie-verwante verhogings. Daarna was die eise dat die verhogings inflasie moet oorskry. Daarna het dit gegroei tot waar ons vandag was, waar stakers salarisverhogings van 100, 200 en 300 persent eis, en weier om daaroor te onderhandel.
Die algemene tendens is: Sit minder in, en kry meer uit. Ons mynwese staan amper stil. Die verlies aan produksie beloop miljarde. Minder werk word gedoen. Minder inkomste gegenereer. Werkskultuur het armer geword, in pleks van ryker. Van werksetiek is daar geen sprake nie.
Die sommetjie is eenvoudig om te maak: Met minder insette, en meer uitgawes, sal ons toenemend met onrus, geweld, lewensverlies en werksverlies in ons arbeidsmag sit. Maak geen fout nie – ons land is vandag baie, baie armer as drie jaar gelede, en dit gaan nie sommer omkeer nie.
Ons is slagoffers van 'n kultuur wat oor baie, baie jare gevestig is, en ons gaan nog baie, baie duur daarvoor betaal. Raak solank gewoond aan die idee.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
