Terwyl die wêreld wag om te sien of die beweerde verkragters van Anene Booysen borgtog sal kry, woed die stryd vir vroueregte oor die wêreld stil voort.
'n Mens hoef nie te veel te sê oor die moord op Anene nie – sy het op 'n brutale, afgryslike manier gesterf, en 'n mens kan jou net indink wat aangegaan het in die gedagtes van haar aanvallers. Dat een mens so iets aan 'n ander wil doen is net ondenkbaar.
In die dae na haar dood was die vae hoop daar dat iets daadwerkliks aan verkragting in Suid-Afrika gedoen sal word, maar intussen het daar nie veel gebeur nie. Dinge gaan net weer aan soos gewoonlik. Die verkragtingstories stroom steeds in sonder einde, en daar is geen keer aan nie.
Hier en daar (ook in ander dele van die wêreld) roep mense uit vir die beskerming van vroue se regte, maar almal weet daar is geen manier om die situasie oornag om te keer nie.
Die rede daarvoor is baie eenvoudig. Verkragting en geweld teen vroue gaan nie sommer verdwyn nie, want dit is nie die gevolg van faktore wat sommer gou verander nie. Verkragting is die gevolg van 'n denkwyse by mans dat vroue daar is om te gebruik; dat hulle inderwaarheid net seksobjekte is wat gebruik en weggegooi kan word.
Dit gaan ook gepaard met 'n gebrek aan basiese menslike empatie en respek vir ander se waardigheid.
'n Mens verander nie daardie stand van sake deur persverklarings uit te reik wat mense vra om op te hou om ander te verkrag nie. Jy vra nie 'n verkragter om op te hou verkrag nie, net soos jy nie 'n reeksmoordenaar vra om op te hou moor nie.
Dit is 'n lang proses van opvoeding wat oor etlike generasies gebeur wat jou leer om ander te respekteer. Jy kan nie daardie soort vaardighede of respek aangeleer word in 'n dag, of 'n maand, of 'n jaar, of selfs 'n dekade nie.
Verkragters word verkragters omdat hulle grootword in 'n omgewing waar vroue (en ander mense oor die algemeen) nie gerespekteer word nie. ‘n Mens verander dit oor ‘n baie lang tydperk, en nie oornag nie.
Dit gaan baie, baie jare duur voor verkragtingsake in ons land verminder, want die sosio-ekonomiese toestande in ons land in die afgelope 50 jaar was perfek vir die vorming van jongmense wat nie respek het vir ander nie. Intussen sal die staatsmasjinerie moet skadebeheer doen deur verkragters baie swaarder te straf, en deur met opvoedingsprogramme te begin.
Belangriker nog: Politici sal moet ophou om hulle eie sakke vol geld te stop, en eerder moet begin werk aan maniere om die sosio-ekonomiese omstandighede in ons land te verander – anders lê daar nog baie, baie jare se hartseer voor.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
