Terwyl die debat oor e-boeke voortwoed, dink ek mense kyk die positiewe aspekte van hierdie verwikkeling heeltemal mis.
Laat ons eers oor die negatiewe praat:
Daar is geen twyfel dat die toekoms bitter donker lyk vir gedrukte boeke nie. Maatskappye wat 'n lewe maak uit die druk en verkoop van boeke op papier veg vir hulle voortbestaan, en dinge sal nie makliker word nie.
Die werklikheid is eenvoudig – boeke sál minder verkoop, en ek is seker daar sal 'n stadium in die toekoms kom wat gedrukte papierboeke eintlik min te sien sal wees.
Met tabletrekenaars wat al hoe goedkoper word, sal daar in die toekoms byvoorbeeld 'n stadium kom wat dit baie meer koste-effektief sal wees om skool- en universiteitshandboeke in elektroniese formaat beskikbaar te stel. Waarom nie? Dis potensieel baie goedkoper en meer doeltreffend.
Geen wonder boekliefhebbers kyk bekommerd toe terwyl hierdie scenario hom afspeel nie. Dis onvermydelik: die boekbedryf sal krimp.
Maar terwyl mense oor dié verwikkeling bekommerd is, dink ek liefhebbers van literatuur mis 'n belangrike punt: Lees is meer gewild as ooit!
Dink daaraan: van die opwindendste ontwikkelings in die tegnologiewêreld die laaste paar jaar het te doen met toestelle wat ons help om te lees. Van iPads tot Kindles, en deesdae die kleiner weergawes van hierdie toestelle, is daar om ons te help om meer te lees. Nie net dit nie – dit help ons ook om beter toegang te kry tot 'n enorme biblioteek literêre werk. Ek het vandag maklike toegang tot meer boeke as waarvan enigiemand ooit tien jaar gelede kon droom!
As hierdie toestelle deel word van ons lewens, en daagliks meer en meer gebruik word, gaan lees as aktiwiteit 'n bitter belangrike deel van ons lewens word. As almal om jou toegang het tot die jongste boeke, inspireer dit jou om ook te lees (selfs mense wat onder gewone omstandighede nie 'n boek sou optel nie).
Met hierdie gewilde toestelle as die middelpunt van tegnologiese ontwikkeling, het maatskappye ook 'n groter motivering as ooit om meer leesmateriaal beskikbaar te stel. Dis in hulle belang dat ons aanhou lees!
Ek dink mense moet 'n bietjie minder bekommerd wees dat boeke gaan "uitsterf", en meer opgewonde raak oor die feit dat lees deel word van ons DNS. Die belangrikheid en waarde van lees is besig om baie toe te neem!
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
