Word afrigters se rol nie oorskat nie?
Dis maar wat in my gemoed kom lê het na hierdie naweek se sport. Ek meen, uiteindelik is dit die mense óp die veld wat die punte moet gaan aanteken. Ek meen, ek kon nie juis opmerk dat Heyneke Meyer anders geskree het op die instrumentjie in sy hande as die ander kere nie. En tog was die uitslag so anders.
Ek kyk eintlik min rugby. Saterdag het ek besluit niks gaan my weghou nie. Ek móét kyk. En die Bokke het ons almal groot geskuld en hulle het daai skuld vereffen. Dit was lekker.
Was ook interessant om te sien hoe daar geskerm word. Sommige van die Bokke het na die wedstryd verdedig soos hulle teen die All Blacks nie kon nie. Hulle het vir Morné Steyn verdedig natuurlik. “Goosen kry g’n lof” – só het die Rapport dit uitbasuin.
Ek weet eintlik min van rugby. Maar ek het my vermoedens. En my heel grootste vermoede is dat die rol wat die jong losskakel op die uitslag gehad het nie onderskat moet word nie.
Dit sit nie in enige mens se broek om ’n goeie losskakel te wees nie. Eintlik is hulle raar. Jy kry daai losskakels wat bekend is vir hulle skopvoete. Steyn is een van hulle, hy’s net nie op vorm nie.
Maar dan kry jy losskakels wat die spel kan lees. Hulle kan vinnig planne maak, na aanleiding van die prentjie wat hulle sien, en dit dan ook implementeer. Dit lê alles in die balverspreiding.
Natuurlik moet die perd darem ook kan skop. Want dis die losskakel wat die balle moet wegkry van die eie gebied af, veral by die eerste fase, maar ook by meeste ander fases is dit die rol wat hy moet kan vervul.
En stelskopwerk kan ’n ontsaglike verskil maak. Want as die balle heeltyd verby die pale seil en nie tussen die goet deur nie, dan verloor jy nie nét punte nie, maar dit breek ook die span se moraal af. Want dan is die harde werk om in die opposisie se gebied te kom pure verniet gewees.
Die Bokke was briljant gewees Saterdag, en regtigwaar, ek twyfel of hulle presies só briljant sou kon wees indien Steyn weer die losskakel sou wees. Ek wonder maar net.
Maar ek wonder stééds oor hierdie hele afrigter storie...
‘We have a good team’ – dít was die kaptein van die Proteas, AB de Villiers, se woorde na afloop van hulle deurslaggewende nederlaag teen Australië in die T20-wêreldbeker. Ja, hulle ís goed.
In sport is dit tog so dikwels so. As die span swak vaar, dan word die afrigter gepos. Ek vermoed die rede hiervoor lê hoofsaaklik opgesluit in die feit dat wanneer die afrigters gepos word, dan skep dit ’n illusie by mense. Dit lyk na iets sígbaars wat gedoen word. Pos net die coach. Dit móét tog die coach wees wat maak dat hulle so sukkel. Wat anders?
En nou sit die Proteas daar, met hulle afrigter wat al die wêreldbeker kon wen, maar tog verloor hulle weer.
Die arme arme Proteas.
Ek weet nie, hierdie dinge van afrigters. Ek weet nie. Dit verwar my net. Ek meen, die Bokke het na ’n totale ander span gelyk Saterdag. Is dit Meyer wat hulle afgerig het tot dáárdie ‘nuwe’ span. Of was dit Goosen wat ’n gevaarliker losskakel as Steyn is?
En die Proteas. Was dit Gary Kirsten wat nou oornag ’n onbekwame afrigter geword het? Of was dit die spelers wat misluk het?
- Hierdie skrywe is een van Barend van der Merwe se jongste inskrywings op sy blog.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
