Goeiedag Riaan,
Ek wil net opreg dankie sê vir al die jare se opoffering, die hoë standaard van uitspraak en taalaanleg wat ek glo geen nuusleser jou ooit sal kan nadoen nie.
My oorlede pa was die mees belese mens wat ek geken het, en het daagliks RSG en BBC-radio geluister, koerante gelees en al wat ‘n historiese boek is verslind. Maar in die aande as dit nuustyd was, is al die ander goed opsy geskuif en het ons hele gesin voor die kassie gesit en op die SAUK ingeskakel.
Veral met elke bulletin wat jy gelees het – want daardie bulletins was van wêreldgehalte.
Ek het vanjaar ook jou outobiografie gelees, en het dit vreeslik geniet – beide jou lewensverhaal en al die staaltjies, maar ook die puik gebruik van ons taal. Dit was regtig ‘n heerlike leeservaring.
Ek het die grootste respek vir wat jy vir die uitsaaiwese gedoen het asook vir jou as mens – baie dankie vir al die opofferings wat jy en jou gesin moes maak deur die jare.
Dit is jammer ons kinders gaan nie so bevoorreg wees om met die nuus gelees deur Riaan Cruywagen groot te word nie – hierdie is beslis die einde van ‘n era, maar ten minste kan ons vir hulle die Haas Das DVD's aanskaf!
Net die beste vir jou en jou gesin vir die toekoms, en geniet die aftrede en rus!
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
