Casino bring ook armoede
deur Anoniem
2010-08-12 07:55
Ons bly naby 'n casino, en dis partykeer hartverskeurend om te sien hoe party mense alles wat hulle het sal wegdobbel.
Dit verstom my altyd om te sien hoe die parkeerarea omtrent 24 uur per dag vol is. Selfs op weeksdae. Iemand maak iewers sakke vol geld hieruit.
En dis nie die ryk mense met te veel geld in hulle beursies wat die plek aan die gang hou nie. Jy kan aan die mense se voorkoms (en voertuie) sien dis baie keer die armer mense wat desperaat is om iets ekstra te wen, of wat droom dat hulle lewens kan verander, wat die laaste bietjie wat hulle het kom wegdobbel.
Ek besef daar is baie mense vir wie hierdie niks meer as ligte vermaak is nie, en dis goed so. 'n Casino skep ook werk vir baie mense. Maar dis asof ons vergeet daar is baie ander wie se lewens negatief beïnvloed word. Ek het een keer gelees dat daar altyd met tyd 'n "ring van armoede" om 'n casino vorm, en as ek so na mense kyk kan ek verstaan hoekom.
Ons lewe in 2010, maar steeds is daar mense wat vas glo hulle gaan op een of ander manier skielik ryk word. En baie van hulle is bereid om alles te gee – die kosgeld; hulle sal selfs meubels verkoop – in die hoop om daardie "jackpot" huis toe te vat. Dis hartseer, maar dis waar. Mense verloor die vermoë om logies te dink wanneer hulle desperaat is vir geld.
Die probleem is dat die regering deesdae al hoe meer casino-lisensies toeken. Daar spring een op om elke hoek en draai, ook in dorpe waar daar gewoonlik nie veel aangaan nie. Is dit nie onveramtwoordelik nie? Moet die leiers van ons land wat daarvoor verantwoordelik is nie 'n bietjie versigtiger wees om sommer orals sulke lisensies toe te ken nie?
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.