Ek het gister persoonlik die eerste keer kennis gemaak met die ontwrigtende optrede van stakers in die Wes-Kaap-provinsie, toe een van my vragmotors ure lank moes stilstaan omdat die pad gesluit was.
Dis een ding om swart-op-wit oor hierdie aksies te lees, en 'n heel ander saak as 'n mens self ervaar hoe dit jou raak.
Ek kan net wonder hoe die joernalis voel wie se motor (goed dan, sy werkgewer se motor) deur die stakers aan die brand gesteek is!
Die vertraging het my 'n hele paar rand gekos, maar nie naastenby soveel soos die boere wat seker al met hulle hande in hulle hare sit nie. Vir hierdie mense het dit ongetwyfeld vinnig verander in 'n stryd om (finansiële) oorlewing. 'n Boer kan persoonlik net 'n sekere mate van ontwrigting dra. Daarna word dit vir hom onmoontlik om te herstel, en hy moet tou opgooi en sy plaas verkoop.
En dis juis hierdie punt wat ek nie kan verstaan nie: Wil jy vir my sê hierdie plaaswerkers besef nie dat hulle hulle eie werke in die gedrang plaas met hierdie stakings nie?
Kyk maar net wat die afgelope week of twee by een van Harmony se myne gebeur het. Werkers wat verlede jaar gestaak het, het aan die begin van die jaar gehoor hulle kan nie teruggaan werk toe nie omdat die myn moet besluit of dit nog lonend genoeg gaan wees om oop te bly.
As 'n mynmaatskappy so swaarkry onder stakers se aksie, hoe erg moet dit nie vir 'n boer persoonlik wees nie? 'n Enkel-boer se hulpbronne is mos baie minder as 'n groot internasionale mynmaatskappy s'n! As hulle dit nie kan deurmaak nie, hoe gaan ons boere dit doen?
Die kort antwoord is, hulle gaan nie.
Dit bring my by die groot vraag: Hoekom gryp die regering nie sterker in nie? Is daar nie 'n enkele grootkop wat besef hoe vernietigend hierdie gewelddadige stakings vir die landbousektor gaan wees nie?
Regerings werk met baie geld, so daar is altyd ruimte om 'n bietjie te mors en voort te gaan. Maar een of ander tyd gaan hierdie manne besef die geld is klaar, omdat die basiese strukture wat die finansies voorsien – goed soos plase en besighede – almal vernietig is deur 'n klomp arbeidsboelies.
Waar gaan dit eindig?
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
