Ek was, net soos enige ander Suid-Afrikaner, geskok om te hoor dat Amplats beplan om 14 000 poste te skrap.
Dis 'n groot slag vir enige gemeenskap, veral vir die mense van Rustenburg, waar die meeste van die werke verlore gaan.
Sonder om kras voor te kom, wil ek egter sê ek het dié besluit al lank sien aankom.
Die realiteit van die saak is, die res van die wêreld raak al hoe meer mededingend. Oral in ander lande werk mense langer, vir minder. Hoe is dit dan dat ons hier minder, vir meer wil werk, en dink ons gaan steeds mededingend bly in die wêreldwye mark? Dit werk nie so nie!
Elke werker vandag is deel van die globale ekonomie. Jy ding nie net mee teen 'n mynskag in 'n ander dorp, of 'n programmeerder in jou straat nie – jy ding mee teen die beste in die wêreld. As jy nie genoeg produseer nie, is jy nie nodig nie, so maklik soos dit.
Dit is die les wat platinummyners ook geleer het. Wanneer dit wat jy lewer nie meer lonend genoeg is op die wêreldmark nie, is dit neusie verby, en klaar. Die wêreld gee nie om vir jou griewe nie. Blinde mark-aandrywers weet nie wat jou salaris is nie. Al wat tel, is dat jy so hard, so lank as moontlik werk.
Dit is die harde werklikheid.
Nee, ek sê nie werkers kan uitgebuit word nie. Nee, ek sê nie dis reg om vir minder as niks te werk nie. Al wat ek sê, is dat die faktore wat die mark vir 'n produk dryf, nie omgee vir jou omstandighede nie.
Of jy lewer genoeg, of jy is uit.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
