Dr. L. Fourie het waarlik die woorde uit my mond gesteel met hierdie skrywe.
Woorde wat die afgelope tyd pal in my gedagtes draai – die regerende party is besig om hulle eie land onregeerbaar te probeer maak.
Dit is ’n ding wat absoluut mens se verstand te bowe gaan en jy sukkel om te verstaan hoekom ’n party wat die mag het so iets sal doen. Ek meen, dit IS so, die Wes-Kaap word wel deur die DA regeer.
Maar uiteindelik regeer die ANC die Wes-Kaap. Want die Wes-Kaap is tog deel van Suid-Afrika. En die ANC regeer Suid-Afrika.
En wanneer jy een gemors het in een streek, dan spoel dit outomaties oor na die ander.
Die e-tolstelsel is ’n goeie voorbeeld. As die mense in Springbok dink die hele e-tolstelsel raak hulle weinig, dan verstaan hulle nie die basics van ekonomie nie (hierdie is NET ’n hipotetiese voorbeeld en is geensins bedoel as enige belediging aan die inwoners van Springbok nie).
Die anargie wat tans in die Wes-Kaap losgelaat is kan verrykende gevolge hê vir die toekoms van die hele Suid-Afrika, en ook dus vir die ANC.
Die oproep deur leiers van die regerende party vir ’n “Marikana in die landbou”, is niks minder nie as skokkend en onsensitief.
Dit eggo die beeld van amptenare wat rondloop en lag oor die dood van mense wat eensame geliefdes nagelaat het, mense wie se skoene nou leegstaan in hierdie land, mense wat liefgehad het, mense wat waardevol was...
Dit is ongewoon dat regerende partye die opposisie se werk sommer self doen, maar daar het jy dit.
Ex Africa semper aliquid novi.
Hierdie is een van Barend se jongste blogs.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
