Elke keer wanneer die onderwerp oor bejaardes op die nuus geopper word, word die beelde van ouetehuise vir bejaardes ("blankes") gebeeldsaai.
Dit skep die indruk dat ouetehuise net deur "blankes" gebruik en ingespan word. Dit laat mens wonder: het die goue oues hul lewelank gewerk om in die ouetehuis te gaan aftree? Het hulle hul afgesloof vir hul kinders om in die oorde geplaas te word?
Daar mag verskeie redes wees waarom die oues van dae 'n "tuiste" moet vind in die soort wonings; baie van hulle verkies dit om sodoende nie 'n las vir die onmiddellike familie te wees nie. Die oorweldigende gevoel en indruk wat 'n mens kry, wanneer jy hierdie plekke besoek, is nie dat hulle dit verkies het nie, maar dat hulle eerder daar geplaas was (geforseerd) deur familielede; deur mense wat as gevolg van die oues van dae se bloedsweet, gekom en gevorder tot waar hulle vandag is.
Eenkant gesmyt, waar hulle nie 'n verleentheid vir die familie kan wees nie, weg uit die publieke oog! Die ou geykte frase: "...dit is die beste vir haar/ hom (bejaarde)", word dan meer kere gebruik bloot om die gewete te sus van diegene wat ontslae wil raak van die oues.
Is dit werklikwaar die beste; gesien in die lig van berigte wat die lig gesien het oor bejaardes wat onmenslik behandel word in ouetehuise. Omstandighede en "oumenskwale en siektes " noop mense om soms 24-uur sorg aan bejaardes te skenk, maar die sorg kan ook tuis aan hulle gegee word deur goed opgeleide en gekwalifiseerde personeel; want baie wil naby die familie wees en nie eenkant weggegooi word soos 'n uitgediende skoen nie.
By die huis word hul waardigheid ten miste 9 uit 10 keer beskerm en handhaaf.
Die wysheid en raad wat hulle kan verskaf is van onskatbare waarde en kan vandag nog aanvaar word in die hedendaagse lewe waar alles bloot 'n gejaag na geld is! Dit is so dat in baie gevalle het 'n mens Job se geduld nodig en nog meer vir die oues van dae; maar meer inspanning en geduld as 'n kleuter van drie tot vyf jaar, sal bes moontlik nie deur 'n bejaarde geverg word nie.
In die tyd waarin ons leef en met die misdaadsyfer wat ten hemele styg, is die kanse dat hulle tuis aangeval, of selfs, die Vader behoede ons, vermoor sal word, 'n groot kommer, maar is hulle veiliger elders of in ouetehuise?
Die verbreking/ afbreek van familiebande het baie daartoe bygedra dat ons in 'n samelewing lewe waarin ons ons nou bevind. Dink maar aan die aandete waar almal om die etenstafel gesit het; nie voor die TV nie, die samesyn vir die aandgodsdiens. Klein dingetjies wat die oues van dae in ons lewens ingestel het en byna outokraties uitgeleef en uitgevoer het!
Dit het alles bygedra tot die hegtheid van gesins- en familiebande.
Daarom laat 'n mens die indruk/ gevoel kry dat die oues van dae in die land eerlikwaar "stank vir dank" kry en in baie gevalle van hul eie gesins- en familielede!
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
