Wat die 2013 seisoen aan betref, is die Bulls een kortkop voor die Stormers met die oortuigende wen op Loftus Versveld verlede Saterdag.
‘n 27-15 wen teen die beste verdedigingspan in die kompetisie is nie te versmaai nie en Frans Ludeke se nuwe afrigtingsresep blyk vroeg-vroeg in die kol te wees.
Morné Steyn is weer “Generaal” Morné Steyn.
Voordat ons te opgewonde raak oor die driemalige Superkampioene se vooruitsigte vir die seisoen, ruk die hoofafrigter Frans Ludeke ons tot sinne; “Verlede week se uitslag is verby. Ons is dankbaar vir daardie sege (teen die Stormers), maar die fokus die week is ‘n nuwe teenstander wat ander uitdagings bied. Die Force is altyd ‘n moeilike teenstander vir ons en sal weereens eise stel aan ons algemene spel en verdediging. Ons het egter goed voorberei en sien uit na die wedstryd.”
Die Bulls is daarvoor bekend dat hulle eerder konserwatief omgaan met spankeuses en Frans Ludeke het dadelik by die aankondiging van die span teen die Western Force, Woensadg, die bespiegeling nekomgedraai dat hy die juniors in die span se lywe sou wou brei vir die oorsese trippie wat van volgende week af vir sy span voorlê.
Dat Ludeke ‘n magdom van talent in sy span het, is so waar soos padda manel dra. As Akona Ndugane nog gekrok is teen Vrydag, stap die blitsige Sampie Mastriet in. So doen Jean Cook ook met die nommer 19 op sy rug nadat hy verlede week doelbewus uit die Tukkie span teen Maties uitgelaat is met die oog op sy Super-debuut vandeesweek.
Cook is een van die mees belowende losvoorspelers wat deur die Bulls opgeraap is. Sy vermoë om agtsteman en oopkantflank te speel is reeds bekend. Sommige meen dat hy die Schalk Burger-tipe flank is, maar ek sou hom nie in dieselfde boks plaas as die moedswillige rondvallery van die Kaapse wynprins nie. Soos ons voorheen al genoem het, laat die reëlwysigings om los spel aan te moedig, sy merk op flanke en die laaste seisoen of wat getuig daarvan.
Nog ‘n rese aanwins vir die Bulls, Jan Serfontein sal waarskynlik ook sy Super-debuut maak en sy giftige spel in die agterlyn kan die verskil tussen een of meer drieë vir die Bulls maak.
Die Western Force is een van die Bulls se moeilike kalante op die rugbyveld. Alhoewel dit lyk asof hulle swaarkry sonder Nathan Sharpe en David Pocock, maak hul kop-aan-kop statsitiek dit ‘n 50% wenrekord teen die Bulls. Die spanne het ses keer teen mekaar gespeel en glad nie in 2012 kragte gemeet nie. Die Bulls se laaste oorwinning op Loftus teen hulle was in 2009 toe die Bulls naelskraap met 32-29 gewen het, maar in 2007 het die Force die Bulls getroef met 27-30 op die einste Loftus.
Saterdag se wedstryd sal nie naasteby die vlak van intensiteit bereik as wat dit teen die Stormers was nie, en die gewonde Force mag dalk net-net voorloop teen halftyd.
In die tweede helfte behoort die Bulls die krane oop te draai en die nuwe bloed in die span behoort te bewys dat hulle hul plek in die Blou span nie toevallig is nie.
Dis soos die Engesle sê “early days”, maar Ludeke en sy span het hierdie week die geleentheid om goed op te warm vir ‘n harde toer wat volgende week aanbreek en soos Pierre Spies ook aan ons gesê het, is hy en sy spanmaats rustig, gefokus en lus vir goeie Superrugby.
Goed begin mag dalk half gewin wees en die jong Bulls span sal die gewoonte hul eie wil maak.
- Hierdie skrywe het op die blog Tussen vier lyne verskyn.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
