Angie Motshekga se stelling dat pres. Jacob Zuma se privaatsake niemand skade aandoen nie, spreek van volslae stiksiendheid of 'n totale onkunde wat om haar aangaan.
Zuma se privaatsake wat sy eie behoort te wees, word landsake wanneer belastingbetalers se geld bestee word vir sy gemak en gerief (privaatsake).
Die vroue wat hy het, versterk net die ou idee van (in sekere tradisies), mans wat vroue neem/ vat wanneer en hoeveel hulle wil! Boonop is die flikflooiery van Angie so ooglopend; veral as 'n mens dink aan die verkiesings wat voor die deur staan.
Blykbaar probeer sy ook hierdeur om die aandag weg te draai van die "handboek-debakel" waarin sy midde-in staan en die onderwys-krisis wat tans in die land ervaar word. Pleks van haar te bemoei met sake in haar portefeulje wat dringend aandag nodig het, is sy nou besig om witvoetjie te soek by Zuma, met die stellings oor sy privaatsake wat niemand enige leed aandoen nie!
Wonings en ander luukshede bekom met belastingbetalersgeld is nie meer privaatsake nie; dit word en IS sake vir die publiek.
Motshekga beter haar bepaal by sake waarvoor sy aangestel was.
So nie, sal sy deur regdenkende Suid-Afrikaners, net soos haar voorgangers (wyle Kader Asmal, Benghu, Nkosazana Dlamini-Zuma) as totaal onbevoeg beskou en seker weer verskuif word na 'n ander departement.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
