Oral in ontwikkelende lande lewe groepe mense in haglike omstandighede.
Werkgewers kan nie altyd verantwoordelik gehou word vir die toestande nie. Hulle kan nie aan werkers ordentlike huise en dienste verskaf en nog hulle ondernemings winsgewend bedryf nie.
Die staat kan ook nie aan werkloses almal werk asook huise verskaf nie. Behalwe dat die geld nie daar is nie, word 'n kultuur van afhanklikheid geskep en mense neem nie verantwoordelikheid vir hulle lewens nie.
Die staat moet goeie onderwys en basiese dienste verskaf en gunstige omstandighede skep sodat klein en groot besighede onder vryemark toestande kan floreer en nie werkskepping strem met arbeidswetgewing soos by ons nie.
Mense moet dan deur harde werk hulle eie potjies krap.
Daar moet ook beperkinge op aanwas wees om te verhoed dat miljoene kinders sonder ordentlike toesig en finansiële ondersteuning ten gronde gaan. Mense sonder werk of kwalifikasies kan nie ongebreideld voortplant nie en dan vir die staat sê: "Daar is hulle, sorg vir hulle welsyn en sommmer vir ons s'n ook."
Die toenemende frustrasie en woede in die land moet nie gerig wees teen die welvarendes, groot werkverskaffers, soos nywerhede , myne en kommersiële boere nie, maar teen die regering. Dis hulle onbevoegdheid, wanbestuur, vermorsing van geld en korrupsie wat vir die toestand verantwoordelik is.
As knap mense (op meriete aangestel) die burokrasie bestuur, sal die frustrasie-barometer dramaties daal en alle dienste sal verbeter.
Soos dit nou is, word verwag dat die onbevoegdes en korruptes wat die probleme geskep het, dit moet oplos. Hulle moet weg, maar sal ongelukkig bly, want hulle naiewe ondersteuners sien net die ANC-stralekrans om hulle koppe.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
