Eendag was daar ‘n moordlustige lam,
‘n kind van die Satan met die naam Saddam.
Hy het dors gekry,
na ‘n stroom gery,
die stroom het uit ‘n doringbos ontstam.
In die bos het die Duiwel se wolf gebly.
Hy het daarvan gehou om met almal te stry.
Hy’t na die stroom gehaas,
neem bo die lam plaas.
Verwoed trap hy modder – hy’t gesmaak vir baklei.
“Ek het sommer lus en maak jou dood.
Kyk hoe bemors jy die water met jou poot.
Ek is George van die Bos
en lam is my kos!
Ek sal jou vreet van die wal tot in die sloot.”
Verskrik het die lam geblêr en gemis:
“Asseblief meneer wolf, ek was nie aspris.
Ek beloof om nooit weer
u stroom te versteur,
solank u net nooit sê u is vir my lus.”
“Nou goed”, sê die wolf, “maar ek het gehoor
dat jy wapens van massa-vernietiging stoor.
Ek sê jou, jou vloek,
ek sal kom ondersoek
en is dit waar, sal ek jou persoonlik vermoor.”
Die lam stal sy mooiste grynslag uit
om te kyk of hy die wolf se agressie kan stuit:
“Ek het tóg my leuse:
ek moor net Irakese.
Ek los ‘n American en ‘n Twenty-eight.
Die bietjie gifgas waarna u soek
is skaars genoeg vir die Koerdiese vloek
en my ander vyande.
Dis regtig ‘n skande
Soos hulle my naam wil vee uit die Boek.”
Toe het George die lam kwaai aangegluur
en die lam trippel rond – dag dis sy laaste uur.
“Ek het nog een vraag
en durf jy dit waag
om my op enige dwaalspoor te stuur!
My Christen raadgewers sê ek moet vis
of jy dalk die wrede Antichris is.
Kan jy dit weerlê
of iets daaroor sê?
Want ‘n ‘ja’ is ‘n spyker in jou doodskis gewis.”
“O my agbare wolf ek staan verstom.
Hoe’t u tot so ‘n gevolgtrekking gekom?
Ek pleit onskuldig
en voel selfs beledig,
maar ek wil tog weet hoe maak u die som.”
“Irak is historiese Babilon.
Sy koning die een wat sal kom, sê my bron.
Hy’s die Antichris,
die groot herrie-vis,
gemorskos vir ‘n geallieerde kanon.”
Die lam skrik groot en word koud soos ys.
Die wolf het hom blykbaar as teiken gelys.
Met verslane verweer
en gemesmeriseer
sug hy: “Your Honour, I rest my case.”
Ter versagting het die lam vir oulaas gesê:
“Ek het gehoor dat die Groot Boek wil hê
dat die wolf
en die lam
vreedsaam en vreetsaam langs mekaar kom lê.”
Sy stem het van rou emosie gebreek,
maar die wolf se ore was toe vir sy preek.
Hy is terug na die bos
met ‘n belofte van kos
aan sy pitbulls waarmee hy hom sou wreek.
Hy laat kom vir Colin sy hoof vegminister
en beveel hom: “Skryf ‘n WMV register.
Maak die pap dik aan
dat ons op vaste grond staan,
maar maak gou! Die saak is so dringend soos gister.”
Die Skrif is toe voor die VN gelê
en nog lank voordat jy ‘mes’ kon sê
is dit goedgekeur,
sonder veel verweer
en George het gehad wat hy wou hê.
Gou-gou was die wolf se oorlog in rat.
Irak het ontplof soos ‘n reuse krytvat.
Oues en kinders
vroue en vegters
se bloed het in Bagdad se strate gespat.
Ook nie lank nie of die regime val plat.
Op die stadsplein sien ‘n lamsbeeld sy wat.
Die lam was geskaak
uit die voete gemaak
en gaan wegkruip in ‘n slangvriend se gat.
Maar ‘n vet losprys het hom uitgewys.
Die mees gesoekte geskrap van die lys.
‘n Ou man gebroke,
moeg maar ontstoke,
het uit daardie donker kelder verrys.
Hy was gedaag voor die wolf se regter.
Het gepleit vir een koeël deur kerk en vegter:
“Laat sak tog my son
voor ‘n vuurpeloton?”
Maar ‘n galg was die lam versus wolf beslegter.
Die wolf en sy makkers was in ekstase.
Die lammers se bloed was ‘n oase.
‘n Reuse banier
verklaar hul plesier:
Mission Accomplished, wys wie is die base.
Maar Iemand hou die gebeure stil dop.
Die wêreld was weereens lekker gefop.
Want voor ‘n TeeVee
wag díé Lam gedwee
dat die tydslot oopskuif, want dan staan hy op.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
