Die afgelope sewe jaar het eerstehandse ervaring opgelewer in die beweeg vanuit ‘n korporatiewe (beskermde) werksomgewing na die privaatsektor se kleiner besigheidsomgewing. Die generiese negatiewe aspekte eie aan die karakter/ eienskappe van veral eienaarbestuurders in beide kleiner en groter besighede het uitgestaan as juis in kontras met dit wat die bestuurshandboeke aan die universitiete se bestuurskole voorhou.
Alhoewel kennis mag bestaan oor hoe om elkeen van hierdie negatiewe verskynsels aan te spreek, bly dit van die moeilikste dinge op aarde om mense sover te kry om jou te glo, jou ‘n mandaat te gee as veranderingsagent en enduit agter jou te staan totdat die regstellings vrugte begin afwerp.
Tipiese generiese negatiewe aspekte is die misbruik van ‘n (misplaaste) magsbasis, swak of geen mense hanteringsvaardighede, die persepsie dat geld alles kan koop (selfs die reg om mense soos kommoditeite te behandel) en die bestaan van ‘n gevoel van onaantasbaarheid. Een entrepreneur wat dit volgens hom “gemaak” het, het my omomwonde ingelig dat hy “bang is vir f….ol” in die lewe !
Dit is asof die sprong vanaf die kleiner besigheid na die effektiewe bestuur van ‘n groter besigheid (wat die resultaat van groei was) net eenvoudig vir die tipiese entrepreneur te groot is om te spring. Die sogenaamde “paradigm shift” en die gepaargaande ongemak met die uitbeweeg uit gevestigde (stagnerende) praktyke, blyk die grootste afskrikmiddel naas die vrees vir die verbrokkeling van ‘n suksesvolle besigheid te wees.
Die eienaar/ bouer van ‘n besigheid wat deur middel van instink en rou intuïsie sy besigheid gebou het vanaf niks tot op die vlak waar spanwydte van beheer net eenvoudig te groot raak vir ‘n “one man show”, beleef dikwels akute angs in sy soeke na oorlewingsgemoedsrus. Kom daar nou ‘n veranderingsagent wat hierdie goed op die tafel sit tesame met moontlike alternatiewe roetes na ‘n meer sekure toekoms, is daar meteens vyandigheid en weerstand en val die pap dadelik op die grond en word die boodskapper geskiet.
In die gejaag na rykdom en sukses is daar eenvoudig nie tyd vir hierdie “regstellings” nie en beur elke ou maar voort op die manier waarin hy glo en wat hom tot ‘n mindere of meerdere mate suksesvol gemaak het tot sover as wat hy dan nou gekom het.
Daarom is die antwoord om jou eie ding te doen, die beginsels toe te pas waarin jy glo en te vergeet van die res se manier van doen. As jy nie uit hierdie benadering satisfaksie kan put en sukses volgens jou eie standaard / definisie van sukses behaal nie, moet jy maar aanvaar dat jou definisie van “lewe” nie so korrek was soos wat jy gedink het dit behoort te wees nie.
Dit is die naaste aan ‘n oplossing vir hulle dilemma wat die werkloses in Suid-Afrika en elders ooit sal kom. Met die regte geleentheid kan elkeen eie waardes, beginsels, kennis, ervaring, praktyke ens., in werking sal stel wat sukses sal bring soos deur daardie selfde persoon gedefinieer.
Nie noodwendig rykdom nie, maar waardetoevoeging, selfversorging, onafhanklikheid en geestelike vryheid.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
