Waar is die opposisie?
deur Corné Brits
2010-03-01 07:35
Dis vir my baie interessant om te sien dat Lynda Odendaal, wat verlede jaar nog Cope se wondervrou was, nou skielik oorgeloop het na die ANC toe.
Ek moet sê, ek is nie seker of ek moet lag of huil oor haar besluit nie.
Met verlede jaar se verkiesing het ons almal vreeslik baie hoop gehad dat daar in Cope uiteindelik 'n ware opposisieparty sou wees wat as alternatief gesien kon word vir die ANC. Maar tot dusver is ons almal lelik teleurgestel deur Cope.
Partykeer wonder 'n mens nog of hulle bestaan, want dis asof daar sedert die tweede helfte van verlede jaar 'n oorverdowende stilte uit hierdie party se kamp kom.
Nou wonder ek net, wat staan ons te doen wanneer die volgende verkiesing kom? Gaan al die Cope-kiesers maar weer by die DA inval? En is dit die oplossing?
Om eerlik te wees, ek dink nie so nie. As ons verandering wil sien in die land gaan dit deur 'n party moet wees wat nie as oorwegend wit gesien word nie.
Daarmee sê ek nie die DA is rassisties nie, maar in die oë van die gemiddelde kieser is die DA net nog 'n party vir witmense.
Daarom is dit so jammer dat Cope ons so vreeslik in die steek gelaat het. Pleks van om hulle posisie te versterk, het hulle in die laaste paar maande absoluut niks gedoen nie.
Al wat 'n mens hoor is dat een van hulle leiers so nou en dan oorloop na die ANC.
As jy my vra is dit nog 'n kans op 'n ware demokrasie wat verspeel is.
Wat nou? Gaan ons ooit 'n ware demokrasie sien in ons land?
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.