Roux-saak wys op polisie se tekortkominge
deur Arno
2010-08-31 08:02
Die storie met Bees Roux is 'n perfekte voorbeeld van wat gebeur wanneer 'n land se polisiemag nie meer vertrou kan word nie.
Ek wil nie sê wie skuldig is of nie, want ons weet nog nie genoeg oor die saak om vas te stel wie is die eintlike skuldige of skuldiges nie. Maar die voorval met Bees Roux is 'n teken van 'n baie dieper probleem, en daardie probleem is dat daar 'n algemene wantroue is wanneer dit kom by die polisie.
'n Mens kan deesdae net nie meer 'n polisieman vertrou nie. Eintlik is 'n mens bang vir hulle.
Wanneer jy afgetrek word klop jou hart in jou keel, want jy weet nie of die polisieman regtig net sy werk doen, en of hy daar is om jou uit te buit vir omkoopgeld, of erger nog, om jou aan te val nie.
Ons het al van soveel slegte berigte oor die polisie gehoor dat ons geneig is om te oorreageer wanneer die polisie oor ons pad kom.
As jy deur 'n polisieman genader word wil jy sommer klaar aggresief raak, want jy weet jy gaan sleg behandel word of miskien gevra word vir omkoopgeld of dalk selfs toegesluit word sonder rede.
Die uiteinde is dat jy oorreageer, en die kleinste verskil loop uit op 'n groot argument.
As dit so aangaan kan ons in die toekoms baie meer sulke episodes verwag.
Soos wat die polisie meer onbetroubaar en korrup word gaan meer en meer mense met die polisie bots en daar gaan al hoe meer sulke tragiese voorvalle wees.
As dinge nie vinnig regkom nie moet ons maar gewoond raak aan sulke koerantopskrifte.
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.