Ontkenning is nie die antwoord
deur Adri
2010-03-10 08:19
Ek verwys na die berig oor die polisiehoof Bheki Cele se jongste uitlatings oor misdaad.
Volgens die berig het Cele gister in die parlement gesê daar is geen bewyse dat meer misdaad hier as in ander plekke in die wêreld aangemeld word nie.
Hierdie soort van stelling is eintlik 'n uitstekende voorbeeld van die regering se houding teenoor misdaad, en som eintlik die probleem mooi op.
Die probleem wat ek het met hierdie stelling is eenvoudig. Ek dink dis onsensitief en onverantwoordelik om te wil ontken dat die misdaadsituasie in Suid-Afrika buite beheer is.
Is ontkenning nie juis die oorsaak van ons misdaadprobleem nie?
As gewone Suid-Afrikaner gee ek nie om wat die statistieke sê nie. Ek gee nie om of daar tegnies in 'n ander land meer kapings is, of iewers oorsee meer inbrake, of watookal is nie. Ek gee net om dat my regering ernstig is oor misdaad, en ernstig is om dit met wortel en tak uit te roei.
Al wat ons vra is dat die regering hierdie probleem, wat duidelik heeltemal buite beheer is, erken, en iets drasties daaraan doen!
Nou ontken Cele dat dinge buite beheer is – soos 'n tipiese alkoholis of dwelmverslaafde wat ontken dat hy 'n probleem het. As jy nie eers die probleem kan erken nie, kan jy mos nie begin om iets daaraan te doen nie.
'n Paar maande gelede het ons almal gedink Cele is ons redder. Nou weet ek nie meer so mooi nie.
Nee wat, Cele, so gaan jy beslis nie 'n verskil maak nie.
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.