Om mediavryheid te kniehalter is inderdaad ‘n ongewenste aanslag op ons gebrekkige demokrasie.
Die Westerse demokrasie in Afrika voer alreeds ‘n opdraande stryd, gevolglik sal so ‘n onnodige stok in die wiel SA se toekoms onteenseglik in die wiele ry. Die wonderwerk in SA sal sy aansien verloor.
Ons hoor opmerkings wat jou bloed laat stol. Opmerkings soos die een deur ene Kolonel Musa Zondi – “Ons het nog nie die punt bereik waar ons mense arresteer oor wat hulle skryf nie” – is genoeg om enige kommentaar in hierdie trant as onverantwoordelik en onaanvaarbaar te bestempel. Die konteks waarin hierdie opmerking gemaak is het niks uit te waai met die beweerde “wan”-persepsie van die man in die straat nie.
Daar is selfs politici soos Seiso Mohai wat vanaf ‘n openbare platform beswaar aanteken omdat verantwoordelike redakteurs self mag besluit watter nuus vir hulle lesers toepaslik is. Kan die rede wees dat die media ‘n beter waghond teen korrupsie is as die politici self? Onetiese gedrag deur sommige politici behoort ‘n reuseverleentheid vir die regering van die dag te wees.
Kiesers behoort kennis te neem van so ‘n ongesonde toedrag van sake voordat hulle weer hulle kruisies trek.
Ongelukkig is die opposisiepartye nog swak en moet die media instaan om wanpraktyke oop te vlek. Die regering is derhalwe meer skrikkerig vir die media as die opposisiepartye. Demokrasie vereis dat redakteurs demokraties aangestel word. Met die gewaande stappe wat die regering wil doen om mediavryheid aan bande te lê kry die burgers die indruk dat die regering nog meer mag wil bekom en sentraliseer.
Daar kan net een rede vir hierdie dwase stap wees, naamlik dat die regering wil wys wie is baas in ‘n land waar soveel vryheid alreeds ingeboet moes word dat die woord "demokrasie" vreemd val op die oor.
Die belowende toekoms wat gekoester is word nou inderdaad deur die regering self bedreig.
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
