Kallis oor die muur?
deur Colin Steyn
2011-12-29 07:00
‘n Mens moet die grootste respek hê vir Jacques Kallis se krekietprestasies en die wonderlike bydrae wat hy oor baie jare vir Suid-Afrika gemaak het.
Ek is die eerste wat hom wil vereer as ‘n formidabele krieketlegende.
Maar is dit nie byna al wat hy nog is nie, ‘n legende?
Ek hou die ding al die laaste twee jaar dop. As hy die slag goed doen met die kolf (wat deesdae nie ‘n alte gereelde verskynsel is nie) word hy opnuut deur kommentators besing, en daar word groot gewag gemaak van hoe onmisbaar hy vir die Proteas is.
As hy keer op keer misluk word sy prestasies van gister as genoeg rede voorgehou waarom hy in die span móét wees. Sy boulwerk is lankal nie meer ‘n faktor in die span nie.
Ek hoor gedurig in besprekings watter dilemma hy vir die keurders skep, want beter boulers (daar is baie) en kolwers wat meer bestendig is (daar is ‘n paar) word eenkant toe geskuif om vir die onmisbare Kallis plek te maak.
Nou wonder ek net: Vir hoe lank sal hy nog op grond van sy reputasie in die span wees?
Ek sê nie hy moet glad nie meer ‘n kans kry nie, maar laat dit dan op grond van vorm wees. Ons Rugby-keurders se grootste fout was toe hulle twee jaar gelede al besluit het wie wêreldbeker toe moet gaan. En maklik die helfte van die span was net daar op reputasie. Ek hoop nie krieket maak dieselfde fout nie.
Boucher is al ‘n slag of wat uitgelaat. Waarom dan nie ook Jacques Kallis nie?
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.