Honger, armoede pla steeds
deur B-B
2010-09-07 13:36
'n Mens kan nie anders as om saam te stem met Flip Buys se rubriek nie. Suid-Afrika laat 'n mens tegelykertyd lag en huil.
Ek dink nie daar is 'n land met soveel potensiaal, maar ook soveel probleme, as ons nie.
Kyk maar net na die wêreldbeker-toernooi; die een dag was ons nog hoog in die wolke omdat ons so goed gedoen het en almal het geglo in ons toekoms, en die volgende dag het ons maar weer begin voortploeter met al ons issues.
Ek wonder net, gaan ons oor 'n paar jaar terugkyk en glimlag, en kyk hoe ons vooruit gegaan het, of gaan ons soos party lande in die wêreld armer doodgaan as ons voorouers, met meer en groter probleme as toe ons in die wêreld gekom het?
Die laaste ruk lyk dit of die tweede opsie 'n werklikheid gaan word. Ons los nie ons grootste probleem – armoede – op nie. Dis die wortel van so baie van ons ander probleme. En ons skep ook nuwe probleme omdat die mense wat ons moet lei net daarop uit is om hulle eie sakke vol te maak. Nie een van hulle sal dit erken nie, maar daar bestaan nie meer so iets soos om jou land te dien nie. Dis elke man vir homself.
Ons kan doen wat ons wil, en kla soveel ons wil. Maar solank as wat daar mense in krothuisies bly en kos bymekaarskraap om te oorleef, so lank sal ons sukkel met misdaad, swak dienslewering en al die ander slegte goed wat ons toekoms kan verongeluk.
Ongelukkig is die enigste manier om regtig 'n einde te bring aan armoede, om politici te hê wat dink aan hulle mense, eerder as hulle eie sakke. En dit lyk of daar maar bitter min van daai soort oor is (as daar nog enige oor is).
Die tyd van twee sportmotors elk vir politici en spoghuise in die Kaap en Pretoria moet vir eens en vir altyd agterbly. Geen persoon wat homself as 'n leier beskou kan sy eie kind in 'n privaatskool sit terwyl die res van die land se kinders nie behoorlike onderrig kry nie. Jy kan nie op kaviaar in duur restaurante leef terwyl die mense wat vir jou gestem het in sinkhuisies moet bly en op pap moet leef nie.
Die groot vraag is net, gaan dit 'n revolusie vat om die regering te oortuig om anders op te tree? Of gaan ons almal nog in armoede gedompel word voor dinge verander?
Die meerderheid stem elke keer dieselfde mense in, maar een of ander tyd gaan hulle moeg word vir die leë beloftes.
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.