Ek stem nie heeltemal saam met die skrywer van die brief “Invorm spelers oor die hoof gesien” nie.
Een ding wat nie uit die oog verloor moet word nie is die groter prentjie, die Wêreldbeker, en hoewel baie van Heyneke Meyer se keuses die oë laat rek, doen hy tog iets reg en dis deur die jong manne, met potensiaal, stadigaan voor te berei vir die groot dag oor drie jaar in Engeland.
Verseker is daar een of twee van die Bul-konneksie spelers wat vrae laat ontstaan en kom ons noem die twee name wat selfs hier in die noorde genoem word as gelukkiges en wel Morné Steyn en Zane Kirchner. Sonder om die manne se karakters aan te val, moet ‘n mens tog hul vorm bevraagteken.
Steyn het ‘n uiters gemiddelde Superrugby-reeks agter die rug en word meestal onthou vir die wedstryde wat hy weens swak skopwerk, pale toe en takties, sy span gekos het. Hy lyk by tye asof hy nie betrokke wil wees by die spel nie en hier moet ek toegee, ek dink hy is totaal ooreis.
Tans nie onder die vier beste losskakels in die land nie en daarom verbaas sy insluiting in die einde van die jaar toer na die noorde my soveel meer. Daar is ‘n legio ander voorbeelde om te noem, maar genoeg daarvan, almal weet waarvan ons praat.
Zane se spel het in die jare sedert hy begin rugby speel het nog niks verander nie. Uiters effektief onder die hoë bal, maar daar stop sy kwaliteite. Sonder uitsondering sal hy die bal eerstens wegskop, middelveld op en dit, ter versagting, opvolg, maar die punt bly staan, balbesit is vermors.
Die tweede opsie wat hy bied is om met die bal wat hy nie wegskop nie, te hardloop en kontak te maak, gewoonlik daaraan vas te hou en op die manier besit af te staan. ‘n Ander swakplek in sy modering is sy aansluiting by die agterlyn. My punt bly staan, dat ‘n heelagter wat by ‘n agterlyn aansluit en met die bal in besit betrap word, nie ‘n heelagter is nie.
Sy aansluiting is uitsluitlik om die man oor in die lyn te skep, maar hy word telkens met bal en al vasgevat.
Daar is plek vir net soveel spelers in ‘n Springbok-span en daarom is dit onregverdig om twee spelers se insluiting te kritiseer, maar tien ander in die groep te wil hê.
Kom ons sien die manne wat hier genoem word as goeie diepte, maar om ‘n speler wat een of twee goeie Curriebeker-wedstryde gespeel het ‘n Springbok te wil maak is ook verregaande.
Catrikillis was baie goed in die meerderheid van die wedstryde wat hy gespeel het, maar daar is ‘n verskil as dit by internasionale rugby kom en ek dink sy blootstelling is nog te minimaal. Ons sal wel volgende jaar sien as hy op ‘n meer gereelde basis vir die Kings sal uitdraf.
Deon Fourie was ‘n revolusie, nie net as speler in verskeie posisies nie, maar ook as kaptein en verdien ‘n plek in die groep, maar waar gaan jy hom speel? Op haker, wat sy gunsteling-posisie is, sit SA met Bismark, Adriaan, Chilliboy, Tiaan nou nog Schalk Brits ook.
In die WP self is daar Ntebeni wat ook uiters effektiewe rugby gespeel het. Nee kom ons wees redelik. In die jare 80 het die WP met ‘n vleuel gesit, Neil Burger, wat gate deur die opposisie se verdediging gehardloop het, menig wedstryde vir die WP gewen het en geen Springbokspan in die steek sou laat nie, maar hy was volgens die keurders nie in die klas van ‘n Ray Mordt nie, so kom ons wees realisties.
Lambie, soos “n haai uit water’ ek stem nie saam nie. Op die dag van die Curriebeker-finaal was hy miskien deur Catrikillis oorskadu, maar losskakel bly sy beste posisie en as Saterdag teen Ierland nie jou vrae kan beantwoord nie, soek dan liewer ‘n ander sport om te ondersteun, maar hy gee absolute rigting aan die agterlyn, versprei die bal onberispelik, uiters akkurate stelskopper en takties verbeter hy by die dag.
Jy verwys na Hougaard wat uit posisie gespeel word, wat dink jy was die impak daarvan op Lambie se spel? Vat maar al die ander veelsydige spelers wat ons land al opgelewer het, kyk hoe’s hulle loopbane verwoes as gevolg van veelsydigheid. Dink maar aan Gaffie du Toit en Brent Russel, om net twee te noem. Ruan Pienaar was byna in dieselfde situasie, maar kyk nou!
Nee, kom ons kritiseer waar dit geldig is, maar kom ons deel ook eer uit waar dit nodig is, maar ook moet ons aanvaar dat nie al ons gunstelinge altyd die beste keuse sou wees nie.
Die media maak dit in elk geval vir Heyneke moeilik genoeg om die regte manne op die regte plekke te kry en hy luister tog as daar geldige redenasies is, Morné Steyn is maar een voorbeeld, die insluiting van Juan de Jongh teen Skotland ‘n ander en hy sal mettertyd swig onder die publiek se druk rondom Zane Kirchner, maar gee hom kans, hy is op die regte pad met die jong manne en nie almal kan gelyktydig vir die Springbokke speel nie.
Oor drie jaar gaan ons met ‘n wen Springbok-span sit waarvan die meeste onder die ouderdom van 25 sal wees.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
