2012 se Curriebeker staan na 11 jaar weer op Nuweland... net vir ‘n rukkie, want politiek het al weer die rugbyterrein betree en die hele WP-kaboedel moet oortrek na die nuwe sokkerstadion in Groenpunt.
Die aankondiging kon ook nie op ‘n meer gelee tyd vir die Blazer Brigade kom nie; kort na die euforie van die oorwinning
Hoe dit ookal sy, die WP was waardige wenners op die dag teen ‘n Sharks span wat nooit uit tweede rat kon kom nie.
WP het by tye die tipe rugby gespeel wat ondersteuners van hul aartsvyande, die Bulle laat kwyl het. Selfs Victor Matfield het na afloop van die wen teen die Goue Leeus dit duidelik gemaak dat WP se rolmaal bewegings die knoop vir hulle sou kon deurhaak teen die Sharks. Dit het inderdaad gebeur. Die WP het die Sharks nooit die kans gegun om op die voorvoet te kom nie en teen halftyd was dit duidelik dat die WP in Durban was vir ‘n sakebesoek.
Eweneens geluk aan Jaco Peyper en sy kollegas wat ‘n hoogs emosioneel belaaide wedstryd goed hanteer het en Saterdag by die pas van hierdie WP-span op ‘n missie, gebly het.
Hierdie Curriebeker-jaar word dus afgesluit op die mees dramatiese wyse waarvoor gehoop kon word. Die leeue moed van ‘n WP-span vol jonges wie vir mekaar en die trui gespeel het, was opmerklik. Net so was Allister Coetzee ‘n waardige wenner wie na afloop van ‘n bloedneus- Superreeks, sy troepe kon herrangskik, motiveer en met sukses aanspoor.
Dit wil gedoen wees!
Die feit dat rugbykrag tans oorhel suide toe, na oorwinnings deur die senior span en die onder 19’s, is ‘n teken dat rugby in die Kaap kerngesond is. Vir eers is vergete die skindertonge wat geklap het oor klubs se dwarstrekkery, onmin in bestuursgeledere en ‘n minderwaardigheid wat wou-wou inkruip in die span se vermoe om punte aan te teken anders as met die skopskoen.
Hierdie was voorwaar ‘n underdog storie met ‘n goeie einde.
Coetzee en sy afrigtingspan se benoude boude met moeë en gekrokte Springbokke soos Jean de Villiers, Schalk Burger, Andries Bekker en Tiaan Liebenberg is eers vergete. Hy, wie saam met Jake White suksesvol was in 2007 se Drienasies- en Wêreldbeker-toernooie, het nou geslyp aan ‘n nuwe geslag van Siya Kolisi, Scarra Ntubeni en Marcel Braché.
Daar wag ‘n bloeitydperk vir die trotse unie, en terwyl die Lions en Sharks nog sit en wonder hoe hulle hierdie een verloor het, sal Coetzee en sy jong span glimlag oor afrigters wie gulde kanse deur hul vingers laat glip het.
Die Superrugby-seisoen is maar 4- en- ‘n- bietjie maande ver. Ons weet reeds dat die OP Kings se vooruitsigte vir die 2013 seisoen so dig soos seemis is. ‘n Ander span wie maar hul vakansieplanne kan kortknip en op die halflyn kan gaan uitkamp, is die Bulls. Dinge by Loftus krap en karring en lyk nie lekker nie. Net so is dit groettyd vir Johan Ackermann en sy manne wie sekerlik ‘n punt sou wou bewys in die Curriebeker seisoen, so hier kort voor hul winterslaap in die Super kompetisie van 2013.
Die WP is waardige kampioene. Anders as ander franchises het WP gewys wat dit is om in die besigheid van rugby, rugby jou besigheid te maak.
Hou hulle maar dop!
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
