Volgens ’n onlangse artikel wat ek gelees het beweer ’n kliniese sielkundige dat die Meyers Briggs-persoonlikheidstoets (MBTI) daarop “dui dat mans ‘denkend’ en vroue ‘gevoelsmense’ is”.
Ek het hierdie ding nou absoluut fassinerend gevind. Ek reken ek het die reg om met hierdie Meyers Briggs-persoonlikheidstoets te verskil. Maar nou voel ek nie baie seker van myself nie. Want dit is ’n regte egte shrink wat hier aan die woord is. ’n Kenner. Wie is ek? Die artikel gaan verder en sê dat “Mans en vroue kan daarby baat om boeke soos John Grey se Men are from Mars and Women are from Venus saam deur te lees. ‘Hierin word tipiese manlike en tipiese vroulike gedrag verduidelik en hanteringsmeganismes voorgestel.’”
Nou, ek sal nie sover gaan om te beweer dat daar geen verskil tussen die manlike en die vroulike geslag bestaan nie. Dit sou ’n absurde bewering wees. Maar ewe absurd is die verskynsel om die verskille tussen die geslagte te oorbeklemtoon en te verabsoluteer. Daar is, wat my betref, veral sommige teaterproduksies wat hierdie dinge uitbuit en volgens my oordeel swaarverdiende geld uit mense wurg met dinge wat niks anders as leuens is nie. Al wat ek vra is, is daar régtig só baie verskille tussen ’n tipiese man en ’n tipiese vrou? Is die mens se basiese behoeftes nie maar universeel nie?
Ek glo dit is júís deur die seksisme van ons voorgangers, deur die stereotipering van ‘manlikheid’ en ‘vroulikheid’, dat ons met hierdie populêre gedagtes rondloop dat dit hoofsaaklik mans is wat ‘logies’ dink en dat dit hoofsaaklik vroue is wat ‘gevoelsmense’ is en minder met hulle koppe dink. Ék dink dit is totale nonsens. Daar mag miskien ’n mate van waarheid daarin steek. Daar mag goeie bewyse wees wat die sielkundige kan aanvoer. Daar mag hope en hope data wees wat hierdie bewering steun, maar waarlik, laat ons maar liewer versigtig wees om hierdie dinge te verabsoluteer.
Ek wil veral twee verdere opmerkings oor hierdie saak maak. Nommer een is dat ons moet onthou dat vroue histories aan die kortste ent getrek het wanneer dit by opleiding kom. En dan is vroue ook gestereotipeer. Sekere werk, veral daardie kille meganiese beroepe wat verál staatmaak op logika, dinge soos motorwerktuigkunde, ingenieur of loodgieter, dit is alles beroepe wat in die verlede uitsluitlik deur mans gedoen was en derhalwe was dit mans wat hierin opgelei is en die reputasie van mans as ‘logiese’ denkers is daardeur gepopulariseer.
Interessantheidshalwe, wie leef tipies langer, mans of vroue? Wie eet tipies gesonder, mans of vroue? En dan wonder ons wie dink méér logies as dit by lewensstyl kom, mans of vroue?
Is dit nie so dat mans die vroulike geslag gruwelik stereotipeer nie? Is dit nie so nie dat dit oorwegend máns is wat pornografie kyk terwyl dit oorwegend vroue is wat aan kletskamers op die internet verslaaf raak? Is dit nie so dat pornografie die méés vertroebelde beeld is van seksualiteit wat daar moontlik kan wees nie? Waar lê die logika dan nou?
En is dit so dat dit ‘minder logies’ is om ’n groter behoefte te hê aan emosionele intimiteit as aan fisieke intimiteit? Ek meen, om seks te hê is redelik vinnig verby in vergelyking om dag na dag saam met iemand te moet leef en kinders saam groot te moet maak…
Al wat vir my oorbly, al wat ek oor wonder, is dat ek nou vir die sielkundige sal wil vra, is dit régtig, is dit régtig égtig so dat mans meer ‘logies’ dink as vroue? Of is ons nie maar heel dikwels besig om onsself te bluf deur sulke dinge te sê nie? Is ons nie maar net besig om populêre menings te verabsoluteer nie?
Hierdie is ’n uittreksel uit een van Barend van der Merwe se blogs.
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
