Ek's seker een van die paar Suid-Afrikaners wat na die Kampioeneliga krieket toernooi kyk, maar indien julle nog nie met entoesiasme gekyk het nie, is nou 'n goeie tyd om te begin.
Die kampioeneliga is 'n T20 toernooi waarin die beste streekspanne in die wêreld kragte meet. Die Highveld Lions en die Titans verteenwoordig Suid-Afrika en die goeie nuus is dat beide spanne na die halfeindronde deurgedring het.
Die Lions speel Donderdag teen my gunsteling die Delhi Daredevils – een van vier Indiese Premierliga spanne wat die toernooi begin het.
Alhoewel die Daredevils my span is, gaan ek kliphard vir die Lions skree, slegs omdat ek my land ten alle koste ondersteun.
Vrydag is dit die Titans se beurt om te kyk of hulle 'n plek in die finaal kan losspeel. Hulle kom teen die Sydney Sixers van Australië te staan.
Sal dit nie wonderlik wees as die Lions en die Titans in die eindstryd van hierdie glanstoernooi meeding nie?
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
