Baie studente gaan tersiêre instellings toe, maar wil nie regtig studeer nie.
Hulle is maar net daar omdat hulle nie werk kry nie of omdat hulle dit as ’n goeie sosiale bymekaarkom plek sien. Dan is daar ook die wat dink hulle word onmiddellik bestuurders as hulle met ’n graad werk soek.
Dan kry ons weer studente wat verdien om daar te wees, maar dit bloot nie kan bekostig nie of deur die kleur van hulle vel nie toelating kry nie.
Ek verstaan nie hoe mense se koppe werk nie. As ek die rektor van ’n universiteit was, sou ek studente op grond van meriete toegelaat het. Ek sou die room van die samelewing geskep het om die beeld van die instansie te bevorder.
Studente wat hulle eerste jaar druip, sal nie weer toegelaat word nie en hulle sal dan maar hulle grade deur die pos moet doen. Daar is geen aanvaarbare verskoning om te druip nie en as jy gedruip het, beteken dit bloot jy’t nie jou kant gebring nie. Dus, kry iemand anders dan die geleentheid wat jy verspeel het. As jy jou skuldig maak aan enige misdryf, moet jy maar seker maak jou tasse is reeds gepak.
Maar die druipsyfers sal baie daal as jy studente op meriete kies. Sodoende kry jy mos die studente wat wil studeer. En dit sal ook nie noodwendig wit studente wees wat toelating sal kry nie, want daar is net so baie anderskleuriges wat ook uitstekende resultate kry op matriek vlak wat vir toelating sal kwalifiseer.
Alhoewel die amptelike slaagsyfers 50% is, sal ek weier om enige punt onder 60% te aanvaar. As ek ‘gemiddelde’ studente wou hê, sou ek my deure mos van die begin af oopgegooi het vir elke Jan Rap en sy pel.
Die kanse dat jy direk uit jou matriek jaar in my universiteit sal beland is skraal. Daar sal eers aansoeke aanvaar word as jy jou matriekresultate reeds in hand het. Dan word die toelatings eksamens en aanlegtoetse geskryf en afhangende daarvan sal jy dan gekeur word. Daarna kan jy solank jou finansies en blyplek begin gereed kry en as die universiteit die volgende jaar begin is al die studente reeds ingeskryf en gereed met hulle boeke om dadelik met studies te begin.
Daar sal dus geen lang rye studente wees nie omdat jy dan lank genoeg tyd het om sonder ’n gejaag deur die hele proses te gaan. Natuurlik sal jy slegs op die kampus toegelaat word as jy uitgenooi word om te kom.
En net soos die studente gekeur sal word, sal die studente ook die reg hê om deur die beste lektore opgelei te word. Daar sal gestrewe word om die beste opleidings geriewe beskikbaar te hê vir die studente want hulle verdien niks minder nie.
Studente sal met trots kan vertel waar hulle studeer, want almal sal weet hulle ‘verdien’ dit om daar te wees. Werkgewers sal toustaan om hulle in diens te neem want hulle reputasie as hardwerkende mense sal hulle voorafgaan.
So, waarom diskrimineer op grond van velkleur? Diskrimineer eerder op grond van meriete sodat net die beste studente verder ontwikkel word om ons ekonomie en ons land weer reg te ruk.
Gee die wat wil studeer eerder die geleenthede.
Ons het meer as genoeg studente wat wil studeer en kan dus bekostig om te kies en keur. So, kom ons bou aan elite-universiteite om elite-studente op te lei...
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
