Honda Accord: Veiligheid kry voorkeur
2011-07-27 12:12
Kaapstad – As voertuie in hul middeljare opgekikker word, is die vernuwings dikwels oninspirerend. Maar die “nuwe” Honda Accord met sy breedvoerige reeks veiligheidskenmerke is beslis ’n tweede kyk werd.
Verbeterings aan die reeds aantreklike Accord kan bespeur word in die voorbuffer en ligte, vering en adrenalieninspuiting wat die 2,2 L-turbodieselenjin gekry het. Laasgenoemde lewer nou 132 kW en 380 Nm, maar drink net 5,8 L/100 km.
Belangriker nog is die vlagskip-Exclusive-model se indrukwekkende veiligheidstoerusting. Sy radargebaseerde impakverminderingstelsel aktiveer die remme vanself as die radar in die motor ’n naderende potensiële ongeluk identifiseer.
Verder is daar aanpasbare snelheidsbeheer wat die afstand tussen jou en die motor voor jou konstant hou, sowel as baanwisselbeheer. Laasgenoemde verskaf tot 80 persent stuurkrag om die motor in sy baan te hou.
Wanneer dit met die slim snelheidsbeheer werk, kan die motor so te sê homself bestuur.
Executive-modelle beskik ook oor xenon-ligte wat om draaie skyn en vanself kan skakel tussen ’n gedompte en hoofligposisie.
Die Accord se stilering is stemmig eerder as sensasioneel, maar ’n mens kan dieselfde van sy mededingers sê.
Wat betref betroubaarheid, die bloedneus wat hy vir sy Duitse mededingers gee en rand-vir-luukses-waarde, verdien die Accord veel meer eer as wat Suid-Afrikaanse kopers hom gee. Wat ’n jammerte.
Honda Accord-reeks
2.0 Elegance R303 000
2.0 Elegance-outo R317 500
2.4 Executive R358 700
2.4 Executive-outo R371 200
2.4 Exclusive R386 700
2.4 Exclusive-outo R401 200
2.2 i-DTEC Executive R388 200
2.2 i-DTEC Executive-outo R401 200
Verrigting 0-100 km/h in 8,1-11,3 sek.; topsnelheid 207-227 km/h; 5,8-8,9 L/100 km (na gelang van die model)
– Huisgenoot.
– Volg Nuus24 op Twitter.