Fiesta ST net vir jóú blitsvinnig
2012-03-15 12:01
Ford het ook uiteindelik die produksieweergawe van sy nuwe klein blitsbuksie, die Fiesta ST, gewys.
Met ’n turbo-aangejaagde 1600-enjin uit die EcoBoost-reeks sal die ST in minder as sewe sekondes by 100 km/h uitkom.Die enjin lewer 134 kW en 240 Nm.
Die ST is deur Ford se Team RS-span ontwikkel wat na die vinnige Fords en motorsport omsien. Dit is dan ook nie vreemd dat die nuwe ST sowat 5 000 km se toetswerk op die bekende Duitse Nürburgring Nordschleife-baan agter die blad het nie.
Die man aan die hoof van Ford se verrigtingsvoertuie, Jost Capito, sê die nuwe ST is by verre die vinnigste Fiesta ST nog en die een wat die beste lyk, hanteer en toegerus is.
’n Nuwigheid van die Fiesta ST is sy MyKey-sleutel waarmee jy kan sorg dat as iemand anders jou ST bestuur, die perdekragkrane ’n bietjie toegedraai is.
Die Focus ST sal vanjaar nog in Suid-Afrika aankom, maar die Fiesta ST sal waarskynlik eers volgende jaar sy opwagting hier maak.
* In Suid-Afrika is hy nog nuut, maar inderwaarheid is Ford se oulike Kuga wat hier te kry is, pas vervang deur ’n nuwe model wat in Switserland sy opwagting gemaak het.
Dit is nog nie seker wanneer die nuweling hierheen sal kom nie, maar aanduidings is dat dit nie nog vanjaar gaan wees nie.
Die nuwe Kuga het trekke van sy voorganger, maar gebruik Ford se nuwe ontwerptaal wat ook in die nuwe Focus te sien is.
Die mediumgrootte sportnutswa sal boonop toegerus wees met Ford se nuwe reeks EcoBoost-petrolenjins en ’n nuwe dieselenjin met twee kraguitsette.
’n Hele klompie nuwe geriefskenmerke sal hul weg na die Kuga baan.
Hieronder tel Ford se nuwe outomatiese bagasieklapdeur wat met ’n geringe skoppie van ’n skakelaar onder die buffer oop- of toe sal gaan. Handig as jou hande vol inkopiesakke is.
Daar sal stemaktivering vir ’n reeks funksies wees, geïntegreerde Bluetooth en kontakpunte vir musiekspelers, asook blindekolwaarskuwing en ’n parallelparkeerstelsel.
Die bagasieruim kan 82 liter meer vrag dra as die huidige model.
Die Kuga se vierwieldryfstelsel is opgeknap vir nog vinniger reaksie en daar sal ook ’n wringkragverspreistelsel (torque vectoring) wees soos in die Focus om vir beter vastrap uit draaie te sorg.
Die Kuga sal een van tien verskillende modelle wees wat op dieselfde platform as die nuwe Focus gehou word.
– Volg Nuus24 op Twitter.
