BMW GS 'n swaargewigkampioen
2011-08-16 13:27
Kaapstad – As jy en ’n teenstander met ’n gewig van meer as ’n kwartton aan die stoei gaan raak, wie dink jy gaan wen?
Volgens Jaco Kirsten van Weg/Ry is dit presies waaroor hy gewonder het terwyl hy agter die stuur van die BMW R1200 GS Adventure 30 Year Anniversary Edition (die naam is net so ’n bielie soos sy gewig) was.
Die BMW R1200 GS Adventure 30 Year Anniversary Edition is groot, het ’n bloedrooi saal en vier dié maatskappy se 30 jaar van dubbeldoelmotorfietse.
Interessant genoeg was die toetsmodel toegerus met hoëverrigting-straatfietsbande wat uiteindelik veelseggend was, want hy begin nou al meer ontuis raak in régtig rowwe dele.
Dit was verlede jaar 30 jaar gelede dat BMW sy eerste veeldoelmotorfiets, die R80 G/S bekend gestel het.
Deesdae noem BMW dié modelle almal “GS’e” wat afgelei word van Gelände/Strasse, oftewel Duits vir veld/pad. En hier is ons nou met die 1200 Adventure-30-jaar-gedenkmodel wat 256 kg weeg.
Dié stukkie geskiedenis is relevant, aangesien die R80 G/S ’n skamele 186 kg geweeg het met ’n vol tenk petrol.
Iewers in die 30 jaar het ’n eenvoudige, ratse konsep 70 kg swaarder geword. En tog het BMW al meer as 100 000 GS’e verkoop.
– Vir meer inligting besoek Weg/Ry.
– Volg Nuus24 op Twitter.