XJ slaan sy kloue in die weeldemark in
2010-04-08 09:43
Egmont Sippel, Die Burger
Jaguar se nuwe vlagskip, die XJ, is pas in Parys aan die wêreldpers bekend gestel. Die vertrekpunt was ’n weelderige hotel op die drumpel van Lodewyk XIV, oftewel die Sonkoning, se indrukwekkende Versailles-paleis.
En hoekom nie? ’n Paleis van ’n motor, soos Rolls-Royce se Phantom, is die nuwe XJ nie. Maar dit is ’n indrukwekkende stukkie motorkunde wat weliswaar, op talle maniere, die weeldesegment herdefinieer.
Stilering staan op die voorpunt van Jaguar se aanslag op die Mercedes-Benz S-klas, BMW 7-reeks, Audi A8 en Lexus LS460. Want kyk, Ian Callum het nogal ’n groot waagstuk met voorkoms aangegaan.
Dis ’n mooi motor, die XJ, daaraan moet jy nie twyfel nie. Maar hy is ook hoogs omstrede, veral van agter af.
Die eerste punt is daardie ligte. Instede van Jaguar se tradisionele driehoekvormige agterligte het Callum die nuweling s’n só ver na bo gerek dat hulle eintlik oor die motor se agterstewe vou en tot bo-op die wielvleuel loop.
As sodanig laat dit ’n mens aan ’n Italiaanse ontwerp – soos Lancia s’n – dink. Die bakvorm self laat ’n mens weer ’n bietjie aan Bentley dink. Waar is die Jag daarin?
A-ha. Kyk mooi, seg Callum. Vanuit ’n relatief breë basis loop die lank uitgestrekte ligte met ’n punt na bo. Dit alles saam vorm ’n driehoek. En hy is reg; dit ís so.
Die ligte se vertikale LED-strepe lyk boonop soos die krapmerke van ’n kat se kloue as die XJ rem. En dis nogal slim.
Jaguar staan nie verniet as die Groot Kat bekend nie. Dit was juis toentertyd – 75 jaar gelede – William Lyons se idee om vinnige, ratse weeldemotors te bou. “Grace, pace and space” was die eertydse leuse.
Dinamies staan die XJ ewe min vir enige van hulle terug. Die laespoed-rit is dalk effe ferm, en om die rante ligweg ongesofistikeerd, in vergelyking met dié van die S-klas. Maar die hoëspoed-rit is puik. Die XJ span die modernste weergawe van Jaguar se CATS-vering in, wat demping tot 500 keer per sekonde aanpas. Dit klink onwerklik, maar met hoë snelhede kan ’n mens dit begin glo as jy voel hoe glad die nuweling oor padhobbels vlieg.
Die soepele manier waarop skokke geabsorbeer word, help ook om die XJ vasvoetig te hou. Daarby is die balans en greep prima, terwyl die stuur met ’n ligte, maklike en uiters vloeiende aksie beïndruk. Dit nou op die standaardmotor met sy 5.0 liter-V8, waar die opbou van stuurgewig en -weerstand baie liniêr en daarom baie voorspelbaar is – iets wat groot vertroue agter die stuur skep.
Op die sterker drukaangejaagde weergawe van dieselfde enjin het die stuur bo 160 km/h egter ’n bietjie lig begin voel.
Die drie beskikbare enjins – al drie verteenwoordig nuwe tegnologie – is die biturbo-3.0 liter-V6-diesel (202 kW, 600 Nm), die 5.0 liter-V8 met direkte petrolinspuiting (283 kW, 515 Nm) en die drukaangejaagde 5.0 liter-V8 (wat in twee kragweergawes beskikbaar is, een met pieke van 346 kW en 575 Nm, die ander met 375 kW en 625 Nm).
Dis krag dié wat haastige 0-100 km/h-versneltye lewer: 6.4 sek. vir die diesel, 5.7 sek. vir die onaangejaagde V8, en 5.2 en 4.9 sek. vir die twee drukaangejaagde weergawes.
- Die Burger
