Wi-Fi-tegnologie verminder dalk ongelukke
2012-08-22 13:26
Michigan – ‘n Amerikaanse regeringsprogram is op die been gebring om te toets of Wi-Fi kan help om motorongelukke te verminder.
Die department van vervoer sê dié program sal voertuie en ander toestelle instaat stel om met mekaar te “praat” en sodoende ongelukke te verhoed en verkeersvloei te beheer.
Ray LaHood, Amerika se minister van vervoer, het by verskeie amptenare by die universiteit van Michigan aangesluit om die tweede fase van Safety Pilot aan te kondig.
“Hierdie baanbreker-tegnologie beloof om die veiligheid en die doeltreffendheid van ons paaie te verbeter. Dit is ‘n wenkombinasie vir motoriste regoor Amerika,” het LaHood in ‘n verklaring gesê.
Die toetsmotors, wat busse, bakkies en vragmotors insluit, is meestal deur vrywilligers aan die universiteit gegee. Dié voertuie is toegerus met draadlose toestelle wat bestuurdes waarsku oor spesifieke gevare soos ‘n aankomende botsing by ‘n kruising in jou blindekol, motors in jou blindekol en wanneer ‘n motor voor jou doodstop.
“Voertuig-tot-voertuig kommunikasie het die vermoë om die grootste verandering in padveiligeheid ooit te maak, maar ons moet eers verstaan hoe om die tegnologie toe te pas,” het David Strickland, hoof van die Nasionale Padveiligheidsadministrasie, gesê.
– Volg Nuus24 op Twitter
- AFP
