Wetgewing kan motors meer lawaaierig maak
2011-09-20 09:08
Londen – Nie so lank gelede nie was ‘n enjin wat stil loop ‘n oorwinning vir motorvervaardigers – maar dit wil voorkom asof dié dae vinnig besig is om iets van die verlede te word.
Voertuie is deesdae so stil dat vrese ontstaan het dit kan ‘n gevaar vir voetgangers en fietsryers inhou omdat hulle dit nie kan hoor nie.
Regerings in Europa en Amerika oorweeg dit nou om motorhandelaars te dwing om die volume so 'n bietjie op te draai deur kunsmatige "lawaai-opwekkers" te installeer.
Enige voertuig wat glo onder die perk van 40 desibels is sal dié opwekkers moet installeer.
Die opwekkers sal in gewone modelle sowel as elektriese motors geïnstalleer moet word.
Daar is tans geen perk vir te min geraas nie, slegs ‘n perk om geraasbesoedeling te voorkom.
Motorvervaardigers het glo reeds begin eksperimenteer met verskillende soorte lawaai, wat wissel van kunsmatige sportmotorklanke tot voëlsang.
– Daily Mail.
– Volg Nuus24 op Twitter.