Wes-Kaap wil nie stelsel vir boetes hê
2011-09-14 07:03
Kaapstad – Die Wes-Kaap gaan die omstrede nuwe Aarto-stelsel vir verkeersboetes met hand en tand beveg.
As dit egter van die nasionale departement van vervoer afhang, sal die stelsel binne enkele maande in die Wes-Kaap toegepas word.
Beamptes van die Kaapse stadsraad is reeds opgelei en selfs die boeteboekies vir die stelsel van die Wet op die Administratiewe Beregtiging van Verkeersmisdrywe (Aarto) is reeds afgelewer.
Die konsepregulasies van die nuwe wet behoort teen einde September gefinaliseer te wees, waarna mnr. S’bu Ndebele, minister van vervoer, dit moet onderteken en in die Staatskoerant moet publiseer.
Die stadsraad en die provinsiale regering sál egter Aarto in die hof beveg indien daar nie waarborge is dat dit behoorlik werk nie.
Wat beteken Aarto vir Kapenaars?
Groter boetes;
Hoër munisipale belastings omdat munisipaliteite nie meer die inkomste van verkeersboetes kry nie, maar steeds dienste op paaie moet lewer; en
’n Strafpuntstelsel wat bestuurders hul rybewyse kan kos.
Daar is egter nog nie ’n enkele strafpunt teen enige bestuurder in die jare lange proeflopies in Johannesburg en Tshwane toegeken nie omdat die stelsel nie tegnies gereed is hiervoor nie, aldus J.P. Smith, burgemeesterskomiteelid vir veiligheid en sekuriteit.
“Om Aarto in te stel sonder die strafpuntstelsel maak geen sin nie.” het Robin Carlisle, Wes-Kaapse minister van vervoer, gesê.
Smith het gesê baie van die basiese dele van die wetgewing is swak deurdink en onprakties. “Dit is teen die Grondwet, want dit ondermyn die mandaat van plaaslike regering om padveiligheid te bestuur,”
Die stadsraad is bereid om ’n interregeringsdispuut te verklaar teen die nasionale departement van vervoer en daarna hof toe te gaan. “Ons het reeds die papierspoor vir ons saak en prokureurs is ook al aangestel,” het Smith gesê.
Munisipaliteite sal dit nie kan bekostig om hul verkeersdepartemente aan die gang te hou en die paaie veilig te probeer hou nie. Die inkomste uit verkeersboetes gaan na die nuwe semi-staatsinstelling wat Aarto bestuur, het Smith gesê.
“Oorbodige nasionale entiteite, soos die Padverkeerbestuurskorporasie, word geskep om die geld te onderskep wat munisipaliteite toekom.”
Smith het gewaarsku mettertyd gaan daar al hoe minder wetstoepassing wees en meer padsterftes.
– Volg Nuus24 op Twitter
- Die Burger