Wes-Kaap het meer dronkbestuurders, hoor hof
2011-05-27 07:12
Kaapstad - Dronkbestuur kom meer in die Wes-Kaap voor as in enige ander deel van die land.
Só het ’n adjunkdirekteur van die Wes-Kaapse departement van vervoer Donderdag in die hooggeregshof getuig in die toetssaak oor die betroubaarheid van die Dräger-asemtoetser.
David Frost het getuig motorongelukke het die provinsie die afgelope tien jaar meer as R12 miljard gekos.
Drank en dronkbestuurders was in meer as 60% van dié ongelukke betrokke. Die nasionale syfer is 50%.
Frost het verwys na die toetse wat in dronkbestuursake gedoen word en gesê die uitslag van ’n asemtoets van die Dräger-toestel is onmiddellik beskikbaar.
Die uitslag van ’n bloedalkoholtoets kan weens die agterstand by die forensiese chemiese laboratorium in Kaapstad enigiets van 6 tot 18 maande neem voordat dit bekend is.
Frost het gesê dit maak daarom sin dat alle beskikbare tegnologie ingespan word om dronkbestuurders doeltreffend te vervolg.
Die gebruik van die asem-alkoholtoets kan help dat die verhore van dronkbestuurders nie vertraag en later laat vaar word nie.
“Dit hou nie net ’n gevaar in vir die bestuurders wat drink en bestuur nie, maar ook vir hul gesinne en ander onskuldige padgebruikers en húl gesinne,” het hy gesê.
Suid-Afrika se eerste toetssaak om die betroubaarheid van die Dräger-asemtoetser te bepaal het Maandag voor regter Nathan Erasmus begin.
Erasmus moet in dié hofsaak bepaal of alkoholvlakke wat deur die Drägertoestel gemeet is as akkuraat beskou kan word. Sy uitspraak oor die toestel se betroubaarheid sal bindend wees in laer howe.
Die beskuldigde in die saak is Clifford Hendricks (27).
Hy het skuld ontken op ’n aanklag van bestuur onder die invloed van sterk drank nadat hy verlede jaar in hegtenis geneem is.
Die saak gaan Maandag voort.
- Die Burger