Waak teen ongeduld en spoed as jy bestuur
2011-12-30 09:03
Sedert die begin van Desember het gemiddeld drie mense per dag op Vrystaatse paaie alleen omgekom.
Volgens Lehana Leeto, direkteur van die Vrystaatse verkeersdepartement, het meer as 100 mense sedert 1 Desember tot eergisteraand op die provinsie se paaie gesterf.
Dit is gemiddeld sowat 3,4 sterftes per dag.
Vrese bestaan dat die sterftesyfer kan styg met talle mense wat nog van vakansie af moet terugkeer.
Leeto het gister op die toneel van ’n botsing tussen ’n motor van Gauteng en ’n bakkie gesê spoed en bestuurders se ongeduldigheid is van die hoofoorsake van ongelukke.
Thando Konzani (13) is op slag dood toe die motor waarin hy en sy pa, Lindela (44), gery het reg van voor teen ’n aankomende bakkie gebots het.
Konzani is ernstig beseer in die ongeluk waarin sy motor meters ver van die pad geslinger is. Die bestuurder van die bakkie, Dumisani Lelatoli (44), is lig beseer.
Die ongeluk het omstreeks 13:30 op die N6 sowat 20 km buite Bloemfontein gebeur
Volgens Leeto moet mense besef dat voertuie gevaarlik kan wees. “Ons doen alles in ons vermoë om die paaie veilig te hou, maar dit is mense se houdings wat moet verander. Elke mens moet sy eie houding verander. Ons kan dit nie doen.”
“Ons gaan streng teen oortreders optree.”
* Twee mans is dood en ’n vrou ernstig beseer toe ’n bakkie en motor omstreeks 16:00 sowat 20 km buite Petrusburg op die pad na Kimberley reg van voor teen mekaar gebots het, berig Jana van der Merwe.
’n Man in die bakkie is op die ongelukstoneel dood.
Die bestuurder (28) van die motor, met ’n Gautengse registrasienommer, is op slag dood. Die oorledenes se name is nog nie bekend gemaak nie.
Die ander insittende van die bakkie, me. Nomazulu Ndlovu (28), ’n polisiebeampte van Kemptonpark, is in ’n kritieke toestand met ’n Rooi Kruis-helikopter na die Pelonomi-hospitaal in Bloemfontein gebring.
– Volg Nuus24 op Twitter.
- Volksblad