Vrou 'steel' haar eie motor
2011-12-06 08:00
Johannesburg – 'n Vrou van Pretoria is in hegtenis geneem en vir meer as 24 uur aangehou nadat sy die polisie gevra het om vas te stel of die motor wat sy gekoop het 'n gesteelde voertuig is.
Jacoline Lipharama wou seker maak die tweedehandse Toyota Conquest waarvoor sy R33 000 betaal het, was nie 'n gesteelde voertuig nie.
"Ek het die polisie van al die besonderhede van die persoon wat die motor aan my verkoop het voorsien, insluitend afskrifte van sy identiteitsdokument en bankstate.
"Hy is die een wat veronderstel was om gearresteer te word," het Lipharama Vrydag aan die Pretoria News gesê.
Lipharama is Dinsdag aangehou en Woensdagaand vrygelaat nadat die aanklagte van die besit van 'n gesteelde voertuig in die Mamelodi-landdroshof teen haar laat vaar is.
Sy sê sy is ses uur nadat die aanklagte in die hof teruggetrek is, vrygelaat.
Die polisie het glo geweier om haar vroeër vry te laat nadat hulle haar daarvan verdink het dat sy hofbeamptes wou omkoop om die aanklagte teen haar te laat vaar.
– Volg Nuus24 op Twitter.
- SAPA