Volvo veilig vir voetgangers
2009-11-11 08:47
Niemand skat Volvo gering as dit by padveiligheid kom nie.
Wanneer dié vervaardiger boonop sê dat niemand teen 2020 in ’n Volvo sal sterf of ernstig beseer word nie, spits gerus die ore.
Volvo het pas nog ’n stap nader aan dié doelwit gegee. Die vervaardiger sê hy beskik nou oor tegnologie wat kan help om ongelukke met voetgangers te vermy of die impak daarvan skerp te verminder.
Volvo se XC60 is die eerste voertuig wat met die City Safety-tegnologie toegerus is.
Laser-tegnologie monitor die voertuig se spoed en die afstand na die motor voor jou en indien dit reken ’n ongeluk is onafwendbaar, sal dit die voertuig tot stilstand bring. Die stelsel is ontwerp vir stedelike omstandighede met snelhede van so 30 km/h.
Dan is daar ook die aktiewe volgafstandbeheer wat in Volvo’s (en ander fabrikate) beskikbaar is. Daarin word die afstand tussen die voertuie met behulp van radar gereguleer en die gekose gaping tussen die twee voertuie word gehandhaaf.
Dié stelsel is aangepas sodat dit self 100% sal rem indien dit reken ’n ongeluk moet vermy word.
Nou het Volvo nog ’n tree gegee deur tegnologie te ontwikkel wat voetgangers ook herken.
Dit is dus nie meer net die ontwerp van die voertuig se voorkant wat ’n sagter impak op ’n voetganger moet hê nie, maar ’n ongeluk kan nou heeltemal vermy word.
Volvo werk al tien jaar aan dié stelsel en dit wil voorkom of die tegnologie volgende jaar in die nuwe S60 sy debuut sal maak.
Dit bestaan uit ’n nuwe radarstelsel en ’n kamera wat sentraal in die voertuig beheer word. Die radar spoor die voorwerpe op en die kamera identifiseer dit as voetgangers.
Indien die stelsel reken ’n ongeluk kan tussen die Volvo en die voetganger(s) plaasvind, sal dit ’n klank-en-ligwaarskuwing aan die bestuurder gee. Indien die bestuurder nie dadelik optree nie, sal die voertuig self 100% rem om die ongeluk te vermy of die impak daarvan te verminder.
Ongelukke teen snelhede van minder as 25 km/h kan vermy word en teen hoër snelhede kan die impak met tot 75% verminder word, beweer Volvo.
Die radarstelsel sal ook in die sierrooster gemonteer wees met die kamera wat op die truspieël geplaas word.
’n Sentrale rekenaareenheid in die voertuig sal die radarstelsel en kamera se waarnemings voortdurend ontleed en besluit op optrede indien nodig. Dit gebeur alles in breukdele van ’n sekonde.
En as jy dink voetgangers maak nie ’n groot deel van ongelukke uit waarby voertuie betrokke is nie, dink weer. In Europa, soos in Suid-Afrika, maak voetgangersterftes soms tot byna die helfte van alle noodlottige ongelukke, veral in groot stede, uit.
Dit is om dié rede dat die botsinstelling EuroNCAP voertuie se impak op voetgangers in ’n botsing beoordeel.
- Beeld