‘Vir elke R1-tolgeld spaar motoris R9’
2012-02-22 07:10
Johannesburg – Vir elke rand se tolgeld op Gautengse hoofweë gaan die gemiddelde motoris R8,84 se waarde kry.
Dié waarde kom in die vorm van tydbesparing en stresvermindering.
Dít is die bevinding van die ekonoom dr. Roelof Botha ná ’n studie waarvan die resultate Dinsdag bekend gemaak is. Dit kom kort voor vandag se begrotingsrede waarin Pravin Gordhan, minister van finansies, na verwagting meer lig sal werp op hoe die R20 miljard se konstruksiekoste aan die paaie betaal sal word nadat die hef van tol vroeër tydelik opgeskort is weens openbare teenstand.
Botha het padgebruikers in vyf huishoudelike inkomstegroepe verdeel. Die rykste vyfde, wat gemiddeld R585 183 per jaar verdien, sal 94% van die tolinkomste betaal. As die tweede hoogste kategorie wat gemiddeld R135 000 per jaar verdien, bygetel word, betaal dié twee groepe saam 99% van die tolinkomste, het Botha bevind.
Die rykste vyfde sal volgens Botha saam sowat R1,6 miljard per jaar aan tolgeld betaal en die tweede rykste vyfde R78 miljoen, vergeleke met die drie armer groepe se gesamentlike toluitgawes van R15 miljoen. Húlle gebruik minder private vervoer omdat hulle dit nie kan bekostig nie en openbare vervoer is vrygestel van tolgeld.
Botha het gesê as padgebruikers net 15% van die tyd wat bespaar word danksy die verbeterde paaie gebruik om inkomste te verdien, sal R2,1 miljard per jaar tot die ekonomie toegevoeg word.
Botha het gesê hy is verbaas die departement van vervoer het so min gedoen om die Gautengse tolpadstelsel se voordele aan motoriste te verduidelik.
“Dit is danksy die tolstelsel dat die Gautengse hoofweë verbeter is,” het Botha gesê.
– Volg Nuus24 op Twitter
- Beeld