Verkla en verklik die padvarke op internet
2012-02-17 09:02
Johannesburg. – Motoriste wat moeg is vir ongeskikte mede-padgebruikers het nou ’n manier om op die internet aan hul frustrasies uiting te gee.
Op www.drivelikeachop.co.za kan mense wat op dié webwerf ingeteken is oor padvarke kla.
Volgens die webblad is dit die aanlyntuiste om almal te vertel van die aap wat voor jou ingeswaai het, of wat te vinnig of roekeloos ry.
Intekenaars kan ’n beskrywing van die voertuig, bestuurder en die registrasienommer van die motoris gee. Motoriste kan ook kyk of hul eie swak bestuursvernuf aangemeld is.
Die man wat die webwerf begin het, maar verkies om nie sy naam bekend te maak nie, het gesê hy het die idee ná eindelose klagtes van vriende gekry.
“Almal kla altyd oor hoe ander mense bestuur, oor hoe roekeloos minibustaxibestuurders is. Ek was self gatvol oor die verkeer in die middestad en het besluit om ’n forum te begin waarin mense hul frustrasies kan uithaal sonder om iets gevaarliks te doen.”
Hy het die webwerf in Augustus verlede jaar geregistreer en sedertdien kla dosyne mense landwyd daagliks.
“Ek wil hê mense moet in hul eie woorde vertel wat met hulle gebeur het en die besonderhede van die ‘oortreders’ bekend maak. As jy soos ’n tjop ry, verdien jy dit dat almal daarvan weet.”
Daar is ook heelparty klagtes op die webwerf oor minibustaxi’s en foto’s van ongemanierde bestuurders.
Daar geld sekere voorwaardes vir intekenaars, waaronder dat hulle verantwoordelikheid vir die inhoud van hul plasings moet aanvaar. “Die drivelikeachop-platform moet verantwoordelik gebruik word en is daargestel om veilige bestuur te bevorder.”
– Volg Nuus24 op Twitter
- Beeld