Verkeerslui eis hoof, ‘vriende’ moet gaan
2012-01-26 09:02
Johannesburg – ’n Groep van sowat 200 verkeersbeamptes en ander personeel van die Padverkeersbestuurskorporasie (RTMC) eis die RTMC se waarnemende uitvoerende hoof, Collins Letsoalo, en “sy vriende” moet onmiddellik hul poste ontruim.
Dié vriende word by name genoem in ’n memorandum waarin die eis uiteengesit word.
Dié groep stakers het gister buite die RTMC se kantore in Faerie Glen, Pretoria, saamgedrom om die memorandum aan Letsoalo te oorhandig.
Hulle dring daarop aan kwessies – waaroor hulle al sedert Mei 2011 kla en wat steeds onopgelos is – teen 31 Januarie afgehandel moet wees.
Hulle dring ook aan aanstellings wat Letsoalo gemaak het sedert hy in dié pos aangestel is, moet ondersoek word.
Bewerings van voortdurende viktimisering van personeellede en dat hulle gedurig met afdanking gedreig en ook afgedank word, word ook in die memorandum gemaak.
Ander griewe gaan oor oortydbetaling en gebrekkige mediese voordele.
Die stakers het gister die tweede agtereenvolgende dag in uniform buite die kantore betoog.
Hulle het egter ontken dat hul staking onwettig is.
“Ek weet nie waaroor die bohaai gaan nie. Nog geen dispuut het ontstaan nie,” het Letsoalo gesê.
“Dié mense is besig met ’n onwettige staking.”
Letsoalo het geweier om die memorandum met die werknemers se griewe in ontvangs te neem en is toe terug na sy kantoor.
Gilberto Martins, ’n spesiale raadgewer vir die minister van vervoer, mnr. S’bu Ndebele, is gestuur om die situasie te ontlont.
Martins het die memorandum in ontvangs geneem en ’n afskrif daarvan aan Letsoalo in sy kantoor oorhandig.
Martins het onderneem om ’n afspraak namens verteenwoordigers van die groep met die minister te reël om die kwessies te bespreek.
– Volg Nuus24 op Twitter.
- Die Burger