VW amptelike voertuig vir Dakar
2009-11-17 12:51
Kaapstad - Die Volkswagen Amarok is die amptelike voertuig vir die 2010 Dakar wedren.
Volkswagen Kommersiële Voertuie is bevestig as die “Amptelike Voertuig Voorsiener” vir die 2010 Dakar-wedren en sal ‘n totaal van 35 voertuie aan die organiseerder van die wedren, Amaury Sportorganisasie (ASO), voorsien.
Die Volkswagen Amarok vloot sal as ondersteunings-voertuie vir die wedren gebruik word.
Die Dakar-wedren word beskou as die wêreld se moeilikste wedren wat oor verskeie lande strek. Dit begin op 1 Januarie en eindig 17 Januarie 2010 in Buenos Aires in Argentinië.
Die roete beslaan sowat 9 000km se woestyn hoë duine en diep sand tussen Argentinië en Chile. Vier van die 14 bene van die wedren sal deur die Atacama-woestyn loop. Hulle sal ook twee keer die Andes oorsteek (4 700 meter bo seespieël).
Volkswagen motorsport hoop om dit twee in ‘n ry te maak, na Giniel de Villiers en sy mede-bestuurder Dirk von Zitzewitz se triomf in die 2009 Daker-wedren.
Volkswagen Motorsport het hierdie jaar vyf motors ingeskryf.