Tydren-Fiesta kry nog oemf
2009-12-10 09:04
Beeld - Fiesta-eienaars sou darem wat wou gee om ’n 206 kW-oondjie in hul ryding te hê.
Dit is presies wat die 2.0 liter- Pipo Duratec-enjin uitskop wat Ford volgende jaar in sy S2000 Fiesta vir die wêreldtydrenkampioenskap (WRC) gebruik.
Die nuwe Ford-tydrenmotor sal dié krag teen 8 000 r/min. lewer, met wringkrag van 260 Nm teen ’n hoë 6 500 r/min.
Boonop trek die doelgeboude Fiesta, wat eintlik bitter min gemeen het met die produksiemodelle, met al vier sy wiele en hy spog met ’n sesgang-opvolgratkas.
Ford se Mikko Hirvonen sal die nuwe Fiesta S2000 in die Monte Carlo-tydren toets, wat van 19 tot 23 Januarie gehou word.
Dié tydren is een van die bekendstes en een waaroor baie rolprente al gemaak is, maar vorm nie deel van die WRC-kalender nie.
Die amptelike WRC-seisoen skop eers in Februarie af.
Ford sal bitter graag volgende jaar die WRC-titel wil inpalm, aangesien Hirvonen vanjaar met slegs een punt teen Sebastien Loeb (Citroën) verloor het.
Die Fiesta het reeds ’n nie-amptelike buiging gemaak toe hy as ’n veiligheidsmotor tydens die onlangse Skotse tydren gebruik is.
Ford het reeds die Monte Carlo-tydren gewen toe Marcus Grönholm in ’n Focus RS in 2006 die vinnigste in dié ren was.
- Beeld