Toyota weer topverkoper
2012-07-26 11:35
Tokio – Toyota is weer bo-aan die ranglys vir motorvervaardigers na die maatskappy amper vyf miljoen voertuie in die eerste helfte van 2012 verkoop het.
Dié groep, wat ook Lexus-, Daihatsu- en Hino-voertuie vervaardig, het ‘n rekordhoeveelheid van 4,97 miljoen eenhede wêreldwyd verkoop gedurende die eerste ses maande van 2012, amper 34% meer as die verkope gedurende dieselfde tyd verlede jaar.
Dit het Toyota bo sy naaste mededingers, General Motors (4,67 miljoen eenhede) en Volkswagen (4,45 miljoen eenhede), geplaas.
Toyota het verlede jaar die titel as die wêreld se grootste motorvervaardiger verloor, ‘n posisie wat hy van 2008 tot 2010 beklee het. Die afname in produksie sedert 2010 het te make met verlaagde verkoopsyfers wat deur die tsoenami van 11 Maart in Japan, die vloede in Thailand en die sterk Yen veroorsaak is.
Die Japannese motorvervaardiger sê hy verwag om sowat 9,58 miljoen voertuie wêreldwyd vanjaar te verkoop, maar is onseker of hy die deur die res van die jaar die topverkoper sal bly.
– Volg Nuus24 op Twitter
- AFP
