Toyota, Lexus wil hul hibried-voorsprong behou
2010-07-22 14:59
Kaapstad – Toyota se Prius is al sterk gevestig in ons geheue as ’n mens aan ’n hibriedvoertuig moet dink.
Dié Japanse waentjie is wel die vaandeldraer, maar daar is vandag heelwat hibriedvoertuie in Suid- Afrika te kry en nog ’n paar sal binne die volgende jaar hul opwagting hier maak.
Een van die vervaardigers wat ’n hele reeks hibriedvoertuie plaaslik beskikbaar het, is Lexus (RX450h, GS450h en die groot LS600h L).
Veral in die RX-sportnutsreeks kry die hibriedmodelle baie aftrek en omtrent die helfte van die RX’e wat plaaslik verkoop word, is hibriede.
Honda se CR-Z-hibried word binnekort bekend gestel en Porsche se Cayenne-hibried sal voor die einde van die jaar hier wees.
En dan is daar gerugte oor Land Rover en BMW se hibriede wat ook die een of ander tyd kom.
’n Mens moet ook waak teen die “sagte” hibriede wat byvoorbeeld net ’n stop/ry-stelsel gebruik en nie ’n tradisionele hibried in die ware sin van die woord is nie.
Volgens die meeste definisies is ’n regte hibried ’n voertuig wat van twee verskillende kragbronne gebruik maak vir aandrywing.
In beginsel is ’n hibriedvoertuig een waar die tradisionele binnebrandenjin hulp in die vorm van ’n elektriese motor(s) kry en dan wissel die elektriese hulp ook boonop.
Die nuwe Cayenne-hibried kry sowat 35 kW se hulp van die elektriese motor (245 kW van die petrolenjin), die Prius 60 kW (73 kW van die petrol-enjin) en die Lexusse ’n stewige 147 kW of in die GS450h se geval, 218 kW van die petrol-enjin wat daarby getel kan word.
Lexus sê egter dis nie net ’n kwessie van syfers bymekaar tel nie, maar hoe die twee kragbronne saamwerk vir sinvolle aandrywing en beskou die Lexus se kraglewering eerder as 250 kW in totaal as dit by bruikbaarheid kom.
Toyota en Lexus is vol vertroue dat hulle die groter hibried-aanslag sal kan teenstaan, aangesien die groep al by sy derdegeslag-hibriedvoertuie is.
- Die Burger