Tata bevestig planne vir motoraanleg in SA
2011-07-11 10:19
Kaapstad – Die motorvervaardiger Tata gaan ‘n motoraanleg in Rosslyn, Pretoria open, het Business Day berig.
Debasis Ray, die maatskappy se woordvoerder in Doebai, het dié belegging bevestig.
“Ons gaan nie enige besonderhede bekendmaak nie, maar daar word al vir ‘n geruime tyd beplan om ‘n motoraanleg in Suid-Afrika te open,” het hy gesê.
Volgens Ray sal Tata binnekort meer besonderhede bekendmaak.
Hy wou ook nie kommentaar lewer oor die grootte van Tata se belegging, of watter soort voertuie die motoraanleg sal bou nie.
Intussen het Toyota SA bevestig dat hy in gesprekke met die regering is om minibustaxi’s by 'n motoraanleg in Durban te vervaardig, terwyl die Calibra Motor Corporation ‘n motoraanleg in Harrismith wil oopmaak om Chinese taxi’s te vervaardig.
– Volg Nuus24 op Twitter.
- SAPA