Tap selfs méér krag uit GTI

2010-04-23 09:35

JY kan selfs ’n bietjie meer woema uit jou nuwe Golf GTI toor met Steve’s Auto Clinic se eerste- en tweedefase-ombouings vir die haastige Golf.

En dit was ’n uitdaging om die Golf nog vinniger te maak aangesien die nuwe 155 kW­enjin aansienlik van die ouer 147?kW-weergawe verskil.

In die eerste fase is daar nou onder meer ’n nuwe vryvloei-uitlaatstelsel (sonder ’n katalitiese omsetter) en ’n nuwe lugfilter vir die 2 liter- turbo-aan­gejaagde enjin.

Die eerste fase van opkikkering bring sowat 15% beter kraglewering mee en kos rondom R12 000, afhangende van die soort uitlaatstelsel wat jy wil gebruik.

Die tweedefase-ombouing sluit ’n silinderkop met beter lugvloei in en ’n drukverhouding wat effens laer is.

Dit en ’n paar ander geringe veranderings voeg sowat 3% krag by. Fase een en twee sal jou sowat R22 000 uit die sak jaag.

Dit beteken dat die enjin nou sowat 180 kW uitskop met wringkrag van 330 Nm, aansienlik beter as die 155 kW en 280 Nm van die standaard­enjin.

Hieronder is ’n kragvergelyking met nog een van die land se superblitse, die Audi S3 Sportback.

Uit die gegewens kan gesien word presies hóé kookwater die opgekikkerde GTI is:

SAC VW Golf Mk VI GTI vs. die Audi S3 Sportback:
0-100 km/h – 6.06 s. vs. 7 s.
0-200 km/h – 25.16 s. vs. 26.00 s.
¼ myl – 14.35 s. vs. 14.89 s. met 160.44 km/h vs.156.03 km/h.
1 km – 26.06 s. vs. 26.77 s. met 202.27 km/h vs. 202.35 km/h.
Topspoed is 251.46 km/h vs. 252.35 km/h.

- Beeld