Swendelaar loop motorhandelaar in
2012-01-28 08:30
Parys – ’n Gesoekte motordief het verlede week met ’n motor van R260 000 by ’n motorhandelaar in dié dorp uitgery nadat hy in die handelaar se kantoor ’n vals internetbetaling gedoen het.
Die 28-jarige dief word oor die land heen gesoek weens meer as tien bedrog- en diefstalklagte van miljoene rande.
“Hy het Vrydag na die motor kom kyk en gesê hy stel belang. Hy het ’n internetbetaling op ons rekenaar gedoen, die bewys aan ons gegee en met die motor uitgery,” het Pieter Strydom van Auto Investments in Vanderbijlpark aan Volksblad gesê.
Strydom het gesê al die regte prosedures is gevolg en niemand het onraad vermoed nie.
Die man het met ’n grys Mazda CX7 (2009) met registrasienommer ZSR 202 GP by Auto Investments op Parys uitgery.
“Die oorbetaling het eg gelyk, met al die nodige bankinligting op,” het Strydom gesê.
Hoewel die bewys van betaling in hul besit was, is geen geld egter toe aan die handelaar oorbetaal nie.
“Die bank het dit Maandagoggend bevestig,” het Strydom gesê
“Hy (die dief) het baie mense van oor die land heen groot skade berokken.
“Van die ouens moes hul ondernemings sluit,” het ’n ingeligte aan Volksblad gesê.
Volgens die bron werk die man alleen.
Hy het gesê die man maak self die “oorbetaling” by die onderneming wat hy bedrieg en alles lyk eg.
Volksblad verneem die swendelaar verkoop glo die gesteelde voertuie in die buiteland.
Strydom het vandeesweek ’n e-pos gekry waarin motorhandelaars landwyd gewaarsku word teen die man en dié slenter.
Die polisie op Parys ondersoek ’n klag van bedrog en diefstal.
Hulle soek na Willem Gerhardus Kok wat hulle moontlik kan help in hul ondersoek.
Mense met inligting oor Kok kan die polisie bel by 056-816-2510 of Strydom by 016-931-1159.
– Volg Nuus24 op Twitter
- Volksblad