Stelsel bietjie omslagtig maar dit werk
2009-11-06 08:23
MARNUS HATTINGH
Die gewildheid van die Discovery het Toyota genoop om ook te kyk wat dié Britse knaap dan alles doen wat hom so ’n gunsteling onder die dikbeursie-4x4-klante maak.
Wel, die een antwoord was die Disco se gebruikersvriendelike 4x4-stelsel. Deesdae is só baie elektroniese hulpmiddels onder ’n veldvoertuig se enjinkap ingebou dat dit nogal kopkrap kan kos om – voordat jy teen ’n sandduin uitry – te moet uitwerk wat aan- en wat afgeskakel moet word.
Die Disco se antwoord was sy sogenaamde TerrainSelect-stelsel, ’n gewone draaiknop langs die rathefboom waarmee jy een van vyf voorafgekose padtoestande kan kies. Vir genoemde sandduin kies jy dus “sand,” en presto! daar is jou Discovery al klaar in laestrek met ’n ewenaarslot gesluit en ’n petrolpedaal wat baie speling toelaat voordat hy reageer.
Die nuwe Prado het ’n soortgelyke stelsel, maar Toyota noem dit net Multi Terrain Select. Maar synde ’n Japanse stelsel, moet dit omslagtig, besig en “te ver” ontwerp wees.
Sien, met die Disco se stelsel kies jy jou padtoestand deur net een stap uit te voer: Jy draai die knop van “rotse” na “sand”. Zap. Maar met die Prado moet jy eers die regte venstertjie op jou instrumentpaneel aktiveer. Dan kies jy die opsie om die stelsel te gebruik. Dan sê jy ja, ek wil die stelsel gebruik. Eers dan kan jy (met ’n ander skakelaar) wissel tussen “rotse” en “sand”.
Goed, dat die stelsel dus hopeloos te omslagtig is om te vinnig te gebruik, is ’n gegewe. Maar as jou Prado eers in die regte modus is, laat wiel hy. Die voertuig is ’n gedugte veldryer met sy laestrek-ratverhoudings, sy kragverspreiding tussen die wiele, en sy twee ewenaarslotte (in die middel en op die agteras).
Selfs vir ’n groot, swaar voertuig kan hy lekker teen ’n klipperige bult uitklouter. Sy grondvryhoogte van 220?mm is ook heel gaaf, dankie.
Hierbenewens spog die luukse VX-modelle met drie veringverstellings, naamlik Normaal, Gemaklik en Sport (die skokbrekers se fermheid word telkens aangepas).
Iets wat jy wel in gedagte kan hou, is dat die MTS-stelsel net vier opsies het, naamlik modder en sand, klippe, los klippe, en ’n sogenaamde mogul. Toyota het self eers kopgekrap wat “mogul” nou eintlik is, maar toe besluit op ongelyke terrein.
Daar het jy dit nou.
- Die Burger