Só hoes jy vir nuwe groen taks
2010-09-01 06:56
Johannesburg – Mense gaan nou aansienlik meer betaal vir nuwe motors.
Die nuwe “groen” belasting, wat gehef word op nuwe passasiersvoertuie wat meer as 120 g koolstofdioksied (CO2) per kilometer vrystel, tree vandag in werking.
Vir elke ekstra gram CO2/km styg die motor se prys met R85,50 (R75 plus BTW).
Volgens die Nasionale Vereniging van Voertuigvervaardigers van Suid-Afrika (Naamsa) gaan dit ’n gemiddelde prysstyging van 2,5% teweegbring.
Die nasionale tesourie het in ’n verklaring gesê omgewingsbelasting is op die “besoedelaar-betaal-beginsel” gegrond en moet verbruikersgedrag verander. Die tesourie en die bedryf gaan handelaars dus aanmoedig om die CO2-belasting apart op fakture aan te dui, lui die verklaring.
Dit is nog onduidelik of verbruikers die volle bedrag gaan opdok en of motorvervaardigers of handelaars ’n deel daarvan gaan absorbeer.
“Die belasting gaan aan die verbruiker oorgedra word,” het Gary Ronald, woordvoerder van die Automobiel-Assosiasie (AA), gister gesê.
Leo Kok, woordvoerder van Toyota Suid-Afrika, het gesê dié vervaardiger kyk tans na maniere waarop die las op die verbruiker verminder kan word.
Toyota wil veral in gevalle waar mense meer omgewingsvriendelike motors koop ’n deel van die belasting probeer absorbeer.
Guy Kilfoil, hoofbestuurder van kommunikasie by BMW Suid-Afrika, het vroeër aan Sake24 gesê vervaardigers kan weens die mededingende aard van die mark nie die volle belasting in verhoogde verkooppryse aan die verbruiker deurgee nie omdat vervaardigers hulself “uit die mark sal prys”.
Volgens Kok is Suid-Afrika se brandstof nog nie skoon genoeg om in motors te gebruik wat uiters omgewingsvriendelik is nie.
Die enjins van dié motors kan nie met die swaelinhoud in ons brandstof optimaal funksioneer nie, het hy verduidelik.
Dit is moeilik om nou al te sê wat die uitwerking van die belasting gaan wees, het Ronald gesê.
Volgens hom mag dit dalk ’n uitwerking hê op die soort voertuie wat mense gaan koop omdat hulle nie noodwendig dit sal kan bekostig wat hulle wou hê nie.
* CO2-belasting op dubbelkajuitvoertuie word eers van Maart volgende jaar gehef om vervaardigers en invoerders tyd te gee om die CO2-vrystelling daarvan te bepaal.
Volg Nuus24 op Twitter.
- Die Burger