'Slegs 5% het e-skyfie vir tol op pad'
2012-01-13 06:52
Johannesburg – Die betreklik lae registrasiekoers van elektroniese skyfies (e-skyfies) vir Gauteng se nuwe tolhoofweë is ’n aanduiding dat motoriste dit boikot om hul misnoeë met die tolstelsel te kenne te gee, meen die DA.
Die Suid-Afrikaanse Nasionale Padagentskap (Sanral) het vandeesweek gesê 212 906 rekeninge is teen Dinsdag geregistreer.
Sanral het vroeër gesê sowat 2 miljoen skyfies behoort teen Februarie geregistreer te wees.
Dr. Neil Campbell, DA-woordvoerder oor paaie en vervoer in Gauteng, het gesê hoewel dit na ’n groot getal klink, moet dit binne die raamwerk van die getal voertuie op die land se paaie gesien word.
“Daar is sowat 10 miljoen voertuie op Suid-Afrika se paaie en omtrent 40%, of 4 miljoen, daarvan is in Gauteng geregistreer.
Dit beteken minder as 5% van voertuie in dié provinsie is vir e-skyfies geregistreer en die meeste padgebruikers boikot die registrasieproses.”
Dis ’n oorwinning vir die DA en ander organisasies wat motoriste aangeraai het om nie e-skyfies te koop nie, het hy gesê.
Patrick Craven, woordvoerder van Cosatu, het gesê dit is verblydend dat motoriste hul oproep om nie e-skyfies te koop nie ter harte geneem het.
“Ons gaan voort met ons veldtog teen die tolpaaie en ons doen weer eens ’n beroep op motoriste om nie vir e-skyfies te registreer nie en ook nie die rekeninge wat aan hulle gepos gaan word te betaal nie.”
Dit is tyd dat die regering na mense luister en die tolheffings op die Gautengse hoofwegverbeteringsprojek (GFIP) te skrap, het Craven gesê.
“As motoriste die registrasie en betaling boikot, sal die tariefinsameling onmoontlik wees.”
Logan Maistry, woordvoerder van die departement van vervoer, het gesê S’bu Ndebele, die minister, het gister met die nuwe direksie van Sanral vergader.
“Die direksie is besig om ’n aantal sake, waaronder die petisie wat aan die Gautengse petisiekomitee voorgelê is, te ondersoek en te bespreek.
Die raad sal sy voorstelle aan die minister voorlê.”
Die GFIP-finansieringsmodel is ’n prioriteit wat die direksie moet oplos. Die direksie sal sy voorstelle na verwagting binnekort bekend maak.
40% van die voertuie op Suid-Afrika se paaie is in Gauteng geregistreer.
– Volg Nuus24 op Twitter
- Beeld